ماقپال ءجۇنىسوۆا ەركەكتىڭ سىرتتاعى جۇرىسىنە كوز جۇما قاراۋ كەرەكتىگىن ايتتى
ءانشى كۇيەۋى بار ايەلدەرگە سابىرلى بولۋعا كەڭەس بەردى. ايتۋىنشا، ەر ادام باسقامەن كوڭىل قوسسا دا، وعان كەشىرىممەن قاراۋ كەرەك. سەبەبى حالىق ءارتىسى «كۇيەۋىڭدى ۇيدەن قۋىپ شىقساڭ، ول قاشان دا باسقا ايەل تاۋىپ الادى» دەگەن ويدا.
بۇل تۋرالى ماقپال ءجۇنىسوۆا Hit-TV ارناسىنا بەرگەن سۇحباتىندا ايتتى.
قازاقتىڭ ەركە قىزى ەر ادام باسقا ايەلگە كوز سالسا، بارلىعىن اقىلمەن شەشۋگە بولادى دەپ سانايدى.
«كۇيەۋىڭە كوبىرەك كۇلىمدەپ، جىلى ءجۇز بىلدىرگەنىڭ جاقسى. ەر ادام ۇيدەن 30 قادام اتتاسا، بويداق بوپ شىعادى. قىدىرىپ كەتەتىن ادەتتەرى بار عوي. ونى ءبىزدىڭ انامىز دا ايتىپ وتىراتىن. اتا-بابامىزدان قالعان سالت پا دەيمىن؟! اتا-بابامىز دا 10 ايەلگە دەيىن العان عوي. سوندىقتان دا وعان ۇركىپ قاراۋدىڭ قاجەتى جوق. ايەل ادام ءسۇيىپ قوسىلعان كۇننىڭ وزىندە، ەركەك جان-جاعىنا قاراپ جۇرەدى. سەبەبى ۇيدەگى ايەل بابىن تاپپاعان شىعار. سوندىقتان وندايىن كورسەڭ دە كورمەگەندەي بولۋ كەرەك. ءوزىنىڭ وتباسىن ساقتاپ قالۋ ءۇشىن، بالالارىنىڭ بولاشاعى ءۇشىن ايەل ادام اقىلدىراق، كەشىرىمدى بولۋ كەرەك. ول قانشا قىدىرسا دا، سول جاقسى ايەلگە قايتىپ كەلەدى»، - دەيدى حالىق ءارتىسى.
ءانشىنىڭ ايتۋىنشا، ەر ادامنىڭ وپاسىزدىعىن كەشىرمەي، ونىمەن اجىراسىپ كەتكەن جاعدايدا وپىق جەيتىن ايەلدىڭ ءوزى.
«ەر ادام دالادا قالمايدى. ءبىر ايەل قۋىپ شىقسا، ونىڭ ەشتەڭەسى كەتپەيدى. سەبەبى قىزدار تولىپ جاتىر. سوندىقتان دا سابىر كەرەك»، - دەپ ءتۇسىندىردى ول.
