نۇرسۇلتان نازاربايەۆتىڭ «تاۋەلسىزدىك ءداۋىرى» اتتى كىتابى جارىققا شىقتى

استانا. قازاقپارات - استانادا مەملەكەت باسشىسى نۇرسۇلتان نازاربايەۆتىڭ «تاۋەلسىزدىك ءداۋىرى» اتتى جاڭا كىتابىنىڭ سالتاناتتى تۇساۋكەسەرى بولىپ ءوتتى، دەپ حابارلايدى «قازاقپارات» ح ا ا ءتىلشىسى.

تاريحي پۋبليتسيستيكا جانرىندا جازىلعان، قازاق جانە ورىس تىلدەرىندە باسىلعان ەلباسىنىڭ بۇل ەڭبەگى ەلىمىزدىڭ جاڭا تاريحى مەن ونىڭ ەرتەڭىنە دەگەن اۆتوردىڭ كوزقاراسىن تانىتادى. ءسوز باسىندا پرەزيدەنت: «بۇل كىتاپ مەنىڭ ۇلى قولداۋشىم، كەمەل كەلەشەگىنە ءوزىنىڭ قازاقستاندىق جولىمەن قارىشتاعان جاسامپاز حالقىما ارنالادى» دەپ كىتاپتىڭ مازمۇنىن ايقىنداپ بەرەدى.

«ەلباسىمىزدىڭ جۇرەك تورىندەگى تولعانىستارىنان شىققان بۇل كىتاپتى ءبارىمىزدىڭ قاسيەتتى وتانىمىز - قازاقستان رەسپۋبليكاسىنىڭ نەگىزىن قالاعان تۇڭعىش پرەزيدەنتىمىزدىڭ ءوز قولىمەن جازىلعان تاۋەلسىزدىك ەنتسيكلوپەدياسى دەپ اتاۋعا تولىق نەگىز بار»، - دەيدى تۇساۋكەسەر ءراسىمىن جۇرگىزگەن «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد.

جاڭا تۋىندىدا ەگەمەن مەملەكەتتىڭ نەگىزى قالانعان كۇننەن باستاپ ونىڭ قالىپتاسۋ كەزەڭدەرىنىڭ ەرەكشەلىكتەرى مەن 26 جىلدىق تاۋەلسىزدىك داۋىرىندەگى ىشكى جانە سىرتقى سىن-قاتەرلەردى ەڭسەرۋگە بايلانىستى قابىلدانعان شەشىمدەردىڭ ءمان-مازمۇنى مەن تەتىكتەرى ەگجەي-تەگجەيلى باياندالادى. سونداي-اق، كىتاپتا «قازاقستاندىق دامۋ ۇلگىسىنىڭ» تابيعاتى مەن ونىڭ ەۆوليۋتسياسى، باستى ۇستانىمدارىمەن قوزعاۋشى كۇشتەرى سارالانعان. قازاقستاندى جاڭعىرتۋدىڭ ءۇش تولقىنى كەڭىنەن اشىپ كورسەتىلگەن.

كىتاپ ەلىمىزدىڭ جاڭا تاريحىن تۇتاس قامتىعان، مازمۇنى اسا باي 4 بولىمنەن تۇرادى. ناقتىراق ايتقاندا، «مەملەكەتىمىزدىڭ دۇنيەگە كەلۋى. قازاقستاننىڭ ءبىرىنشى جاڭعىرۋى (1991-1995-جىلدار)»، «ۇلى بەتبۇرىس. قازاقستاننىڭ ەكىنشى جاڭعىرۋىنىڭ باستالۋى (1996-1999-جىلدار)»، «قياعا قۇلاش سەرمەۋ. قازاقستاننىڭ ەكىنشى جاڭعىرۋى (2000-2010-جىلدار)»، «قالىپتاسقان مەملەكەت. قازاقستاننىڭ ءۇشىنشى جاڭعىرۋى (2010-جىلدار) » بولىمدەرى وقىرمان قاۋىمنىڭ نازارىنا ۇسىنىلىپ وتىر.

كىتاپتا ءار ءبولىمنىڭ ءوزى بىرنەشە بولىكتەرگە بولىنگەن. ولاردىڭ دا اتاۋلارىنا زور ءمان بەرىلىپ، جاڭا تاريحىمىز بەن قازاقستاندىق قۇندىلىقتاردىڭ داۋىرلىك وقيعالارى ناقتى ءارى ءدال سۋرەتتەلگەن. اتاپ ايتقاندا، «تاريحي ادىلەتتىلىك سالتاناتى»، «تۇعىرى بەرىك مەملەكەتتىك قۇرىلىم»، «باستى قۇندىلىعىمىز - بەيبىتشىلىكتى قاستەرلەي بىلدىك»، «جاڭالىقتىڭ جىلى لەبى جانە قايتا تۇلەگەن ءداستۇر»، «سىرتقى ساياسات: تىڭعا تۇرەن سالعانداي...»، «قياعا كوز تىككەن قازاقستان بارىسى»، «باياندى بولسىن باس قالا!»، «ساياسي تۇراقتىلىقتىڭ جەمىسى»، «تاۋەلسىزدىك رۋحىمىزدى شىڭدادى»، «ءبىز الەمدىك داعدارىس سىناعىنا توتەپ بەردىك»، «بۇرىن- سوڭدى بولماعان زياتكەرلىك ورلەۋ» جانە ت. س. س. بولىمدەردە ەلىمىزدىڭ جارقىن ساتتەرى بۇگە-شۇگەسىنە دەيىن باياندالادى.

«تاۋەلسىزدىك زامانى قازاقستان ءۇشىن عاسىرلار جۇگىن ارقالاعان عالامات ءداۋىر. سونىڭ بارىندە ەلى ءۇشىن تۋعان ەلباسى قازاق ەلىن الەمدىك قاۋىمداستىقتىڭ ەڭ الدىڭعى قاتارىنا شىعاردى. قازاقستان - بۇگىندە ىرگەسى بەرىك، ىنتىماعى جاراسقان، ەكونوميكاسى قۋاتتى، ساياسي جۇيەسى سارالانعان، ءوز جولىن، ءوز بولاشاعىن ايقىنداعان، الەمدىك قاۋىمداستىق الدىنداعى بەدەلى بيىك، ءۇش بىردەي جاڭعىرۋدى ويداعىداي وتكىزە بىلگەن ابىرويلى مەملەكەت. ونىڭ تۋعان حالقىن زامانانىڭ سان الۋان سىنىنان امان الىپ شىعىپ، بيىكتەن بيىككە باستاپ كەلە جاتقان نۇرسۇلتان ءابىش ۇلىنداي كەمەڭگەر باسشىسى بار، - دەدى مۇحتار قۇل-مۇحاممەد.

اۆتور: ايان بەكەن ۇلى