ءورت سوندىرۋشىلەر الماتى تۇرعىندارىن وتشاشۋدان اباي بولۋعا شاقىردى

جاڭا جىل قارساڭىندا بازارلار مەن دۇكەندەر وت شاشۋ قۇرالدارىنا تولاتىنى بەلگىلى. مەرەكە تۇندەرى پيروتەحنيكالاردى قولدانعاندا قاۋىپسىزدىك شارالارى ساقتالماي، كوپقاباتتى ۇيلەر ورتەنىپ جاتاتىن وقيعالار دا از كەزدەسپەيدى. وسىعان بايلانىستى، جاڭا جىل قارساڭىندا ءورت سوندىرۋشىلەر الماتىلىقتاردى ساقتىق شارالارىن ەسكەرۋگە شاقىردى.

«جاڭا جىل مەرەكەسى كۇندەرى الماتىداعى ورتتەردىڭ 40 پايىزى پيروتەحنيكالاردى دۇرىس قولدانباعاننان بولادى. اسىرەسە، كوپقاباتتى تۇرعىن ءۇي كەشەندەرىندە قاۋىپسىزدىك تەحنيكاسى ساقتالمايدى، اتىلعان پەتاردالار بالكوندارعا، جەر ۇيلەردىڭ شاتىرلارىنا ءتۇسىپ ءورت شىعادى. وتكەن جاڭا جىل ءتۇنى بولعان 10 ءورتتىڭ 3-ەۋى پيروتەحنيكالاردىڭ كەسىرىنەن بولدى»، - دەدى الماتى قالاسى ت ج د- نىڭ ءورت قاۋىپسىزدىگى بويىنشا باقىلاۋ- پروفيلاكتيكالىق قىزمەتى باسقارماسىنىڭ باسشىسى مارات بەكبايەۆ.

ستاتيستيكا مالىمەتتەرىنە سۇيەنسەك، 2014-2016 -جىلعى جاڭا جىل كەشتەرىندە پيروتەحنيكالاردان 162 ادام زارداپ شەككەن، ونىڭ 76 سى بالالار. اۋراحاناعا جەتكىزىلگەندەردىڭ جاسى 3-تەن 58 جاس ارالىعىندا. دەگەنمەن، بۇل كورسەتكىش جىل وتكەن سايىن ازايىپ كەلەدى.

ايتا كەتەيىك، جىل سايىن زاڭسىز ساتىلاتىن پيروتەحنيكالاردىڭ انىقتاۋ بويىنشا قالالىق ت ج د مەن ءى ءى د قىزمەتكەرلەرىنىڭ بىرلەسكەن شاراسى 20 -جەلتوقساننان باستالادى. 2015 -جىلى ۆەدومستۆوارالىق تەكسەرۋ كەزىندە 1000 كەلى قاۋىپتى پيروتەحنيكا تاركىلەنسا، 2016 -جىلى 4475 پيروتەحنيكا الىنعان.

«پيروتەحنيكالاردى ساتىپ الاردا ساتۋشىلاردان تاۋاردىڭ سەرتيفيكاتىن تالاپ ەتىڭىز. سونداي- اق، ونىڭ دەفورماتسياعا ۇشىراماعانىن، دىمقىلدانىپ قالماعانىن قاداعالاڭىز. پيروتەحنيكالاردى نەگىزىنەن ارنايى دۇكەندەردەن العان دۇرىس. بازارلاردان دا الۋعا بولادى. ەڭ باستىسى، ساۋدا ورنىنىڭ ءورت قاۋىپسىزدىگى ەرەجەلەرىن ساقتاعانىنا ءمان بەرىڭىز»، - دەدى م. بەكبايەۆ.

سونىمەن قاتار، ول پيروتەحنيكالاردى قولدانعاندا تەحنيكالىق قاۋىپسىزدىككە ءمان بەرۋ كەرەكتىگىن ەسكەرتتى.

«پيروتەحنيكالاردى قولدانعاندا بالالارىڭىزدى باقىلاۋدا ۇستاڭىز. 14 جاسقا تولماعان بالالاردى پەتاردالار اتىلاتىن جەرگە جىبەرمەڭىز. پيروتەحنيكالاردى الاڭقايدا، ەلەكتر قورابى مەن بالكوننان الىس جەردە قولدانۋ قاجەت. پەتاردانى العاش تۇتاتقاندا جانباسا، قايتالاپ تۇتپاڭىز. ونى تۇرعىن ۇيدەن 50 مەتر قاشىقتىقتا قولدانۋ كەرەك. بەنگال شامدارىن قولدانىپ بولعاسىن قوقىس جاشىگىنە تاستاماڭىز»، - دەپ ەسكەرتتى م. بەكبايەۆ.

سونىمەن قاتار، ءورت سوندىرۋشىلەر ۇيدەگى شىرشاعا ەلەكتروگيرلياندالاردى ىلەردە توق وتەتىن سىمنىڭ جارامدىلىعىنا كوز جەتكىزىپ الۋدى ەسكەرتتى.