ەلباسىنىڭ وتباسىلىق پورترەتى كورمەگە قويىلدى

بۇل ءىس- شارا قازىرگى قازاقستاننىڭ ساياساتتاعى، ەكونوميكا مەن مادەنيەتتەگى جەتىستىكتەرىن كەڭ كولەمدە ناسيحاتاۋ بويىنشا «ماڭگىلىك ەل قايراتكەرلەرى. ⅩⅩ عاسىر» قۇجاتتىق كوركەمونەر كورمەلەرى سيكلىنە كىرەدى.

بۇگىن كەلۋشىلەر نازارىنا 200-دەن استام سۋرەتتىڭ، تالدىقورعان قالاسى گەربىنىڭ، الماتى وبلىسى گەربى مەن تۋىنىڭ اۆتورى، سۋرەتشى حامزا قيقىموۆتىڭ تۋىندىلارى قويىلدى.

سۋرەتشىنىڭ 12 جۇمىسى ەلباسىنىڭ ومىرىنە ارنالعان «ءۇشقوڭىر» كىتابىنا ەندى. ونىڭ ىشىندە داستارحان باسىنا جينالعان وتباسى، اكەسىنىڭ اتىنا مىنگەسكەن كىشكەنتاي نۇرسۇلتان، بيداي شاۋىپ جاتقان ەلباسىنىڭ بەينەلەرى بار.

«ونەردىڭ دامۋى رۋحاني وركەندەۋدىڭ قۇرالى بولعاندىقتان، تاۋەلسىز قازاقستاننىڭ الەۋمەتتىك جانە مادەني دامۋى اسا ماڭىزدى باسىمدىق بولىپ وتىر. ەلباسى ن. ءا. نازاربايەۆ ءارقاشان ۇلتتىڭ رۋحاني بايلىعىن بۇگىنگى ۇرپاق ساناسىنا جاڭعىرتۋ كەرەكتىگىن ۇنەمى ايتىپ كەلەدى. سوندىقتان دا جاس ۇرپاققا تاربيە بەرەتىن تاريحتا ورنى بار تۇلعالاردىڭ عالىمداردىڭ، مەملەكەت جانە قوعام قايراتكەرلەرىنىڭ رۋحاني مۇرالارىن كەڭىنەن ناسيحاتتاۋ كۇن تارتىبىمىزدەگى كەزەك كۇتتىرمەس مىندەت. بۇگىنگى كورمەدە سۋرەتشى حامزا قيقىموۆتىڭ تۋىندىلارى قويىلعانى كەزدەيسوقتىق ەمەس. سەبەبى، جاقىندا ەلباسىنىڭ ءومىرى تۋرالى «ءۇشقوڭىر» كىتابىنىڭ تۇساۋكەسەرى بولعان ەدى. بۇل كىتاپقا سۋرەتشىنىڭ 12 كارتيناسى ەندى»، - دەدى ارحيۆ ديرەكتورى بويرس جاپاروۆ.

 «ونەر - ادامنىڭ ىشكى دۇنيەسىن اشارى ءسوزسىز. ماعان شاكارىم ولەڭدەرىنىڭ تەرەڭدىگى ۇنايدى. مىنا سۋرەتىمدە ونى قالاي قابىلدايتىنىمدى كورسەتۋگە تىرىستىم. باسقا دا تابيعات ەتيۋدتارى، ابستراكتىلى كارتينالارىم بار. ادامدار شىعارماشىلىعىم تۋرالى قىزىعۋشىلىق تانىتىپ جاتقانى كوڭىلگە قۋات بەرەدى»، - دەدى سۋرەتشى حامزا قيقىموۆ.

كورمەنىڭ اشىلۋىنا قازاقستان سۋرەتشىلەر وداعىنىڭ، الماتى اكىمدىگىنىڭ، قازاقستاندىق سۋرەتشىلەر مەن مۇسىنشىلەر، ستۋدەنتتەر قاتىستى.

اۆتور: گۇلميرا عوسمانالي