ەلباسى ازاماتتار قۇقىقتارىنىڭ قورعالۋىن كۇشەيتۋگە باعىتتالعان زاڭعا قول قويدى

استانا. قازاقپارات - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىنىڭ پروتسەستىك نەگىزدەرىن جاڭعىرتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.

بۇل تۋرالى اقوردانىڭ باسپا ءسوز قىزمەتى حابارلادى.

زاڭ مەملەكەت باسشىسىنىڭ زاڭ شىعارۋ باستاماسى تارتىبىندە قابىلداندى جانە قىلمىستىق- پروتسەستىك كودەكسكە، «جەدەل-ىزدەستىرۋ قىزمەتى تۋرالى» جانە «پروكۋراتۋرا تۋرالى» زاڭدارعا تۇزەتۋلەردى كوزدەيدى، ولار مىنالارعا:

- قىلمىستىق پروتسەستە ازاماتتاردىڭ قۇقىقتارىنىڭ قورعالۋىن كۇشەيتۋگە جانە قىلمىستىق پروتسەستىڭ قايتالانۋىن ازايتۋعا؛

- قىلمىستىق پروتسەستە، ونىڭ ىشىندە ادۆوكاتتاردىڭ قۇقىقتارىن كەڭەيتۋ ەسەبىنەن جارىسپالىلىقتى ارتتىرۋعا؛

- سوتقا دەيىنگى ساتىدا سوتتىڭ باقىلاۋىن كەڭەيتۋگە؛

- پروتسەستىك وكىلەتتىكتەردى ناقتى بولۋگە؛

- قىلمىستىق پروتسەستى جەڭىلدەتۋگە جانە ۇنەمدىلىكپەن جۇرگىزۋگە باعىتتالعان.

 زاڭنىڭ ءماتىنى باسپا سوزدە جاريالانادى.