الماتىدا ءۇندى قىزىنىڭ تاعدىرى تۋرالى فيلم ءتۇسىرىلدى
قازاق فيلم باسپا ءسوز قىزمەتىنىڭ حابارلاۋىنشا، كينوتۋىندىعا حۋشي ديەۆاني اتتى ءۇندى قىزىنىڭ تاعدىرى ارقاۋ بولعان. ءسۇيىپ قوسىلعان كۇيەۋىنەن قورلىق كورگەن ول، الماتىعا كەلىپ، جۇمىسقا ورنالاسىپ، بيىكتەردەن كورىنەدى.
ەستەرىڭىزگە سالا كەتسەك، بىلتىر شاكەن ايمانوۆ اتىنداعى «قازاق فيلم» ا ق بولليۆۋدتىڭ «Khushi Motion Pictures» اتتى كومپانياسىمەن ىنتىماقتاستىق تۋرالى كەلىسىمشارتقا قول قويعان بولاتىن. بىرلەسكەن ءوندىرىس جونىندەگى كەلىسىم بويىنشا، ەكى جاق «Love you family» تولىقمەتراجدى كوركەم فيلمىنىڭ ديستريبۋتسياسى سالاسىندا قىزمەت ەتۋگە مىندەتتەلگەن.
- فيلمنىڭ ءۇندىستانداعى پروكاتى تابىستى بولدى. قازاقستاندا ەشقاشان بولماعان ءبىزدىڭ كورەرمەندەر ءۇشىن الماتى قالاسىنىڭ ادەمى كورىنىستەرىن تاماشالاۋ قىزىقتى بولدى. قازاقستاننىڭ مادەنيەت جانە سپورت مينيسترلىگىنە جانە مادەنيەت ءمينيسترى ارىستانبەك مۇحامەدي ۇلىنىڭ جەكە وزىنە سەنىم ءبىلدىرىپ، قولداعاندارى ءۇشىن العىس ايتامىز. سونىمەن قاتار، «قازاق فيلم» كينوستۋدياسىنا ءتۇسىرىلىم كەزىندە كاسىبي دەڭگەيدە كومەك كورسەتكەندەرىنە العىسىمىز شەكسىز. بىرلەسىپ تۇسىرگەن تۋىندىمىزدىڭ ءساتتى شىققانىنا قۋانىشتىمىن. مەنىڭ بىلۋىمشە، قازاقستاندا ءۇندى فيلمدەرىن ءسۇيىپ تاماشالايتىن كورەرمەندەر كوپ، سوندىقتان دا بۇل فيلم قازاقستاندىقتاردىڭ كوڭىلىنەن شىعادى دەپ ويلايمىن، - دەدى فيلمنىڭ پروديۋسەرى ۆيپۋل ديەۆاني.
ءۇندى رەجيسسەرى ساچيندر شارم تۇسىرگەن «تۋعان ءۇيىم - تىرەگىم» فيلمىنىڭ ءتۇسىرۋ جۇمىستارى ءۇندىستاندا جانە تايلاندتا ءوتتى. كارتينانىڭ نەگىزگى قويىلىمدارى قازاقستاندا، ايتا كەتسەك، الماتى قالاسىنىڭ كورىكتى جەرلەرىندە ءتۇسىرىلدى (رەسپۋبليكا الاڭى، «اربات»، شىمبۇلاق جانە كوكتوبە).
فيلمگە ءۇندىنىڭ تانىمال اكتەرلەرى - پارداساني اكشا سۋنيل، دجوشي مانوي ناۆانەت، سالمان يۋسۋف كحان، شاكتي كاپۋر، ناۆني پاريحار تۇسكەن. بۇل كارتينادا قازاقستاندىق تانىمال اكتەر فارحات ابدرايىموۆ تا بوي كورسەتەدى.
«قازاق فيلم» كينوستۋدياسىندا قازاق تىلىنە دۋبلياجدالعان (ورىس تىلىندە سۋبتيترلارى بار) «تۋعان ءۇيىم - تىرەگىم» اتتى ءۇندى مەلودراماسى ەلىمىزدىڭ كينوتەاترلارىندا 14- جەلتوقساننان باستاپ كورسەتىلەتىن بولادى.
«تۋعان ءۇيىم - تىرەگىم» («Love you family») فيلمى وتباسى قۇندىلىقتارى تۋرالى باياندايدى. ۇلگىلى ءۇندى وتباسىنىڭ شاڭىراعىندا تۋعان حۋشي ەسىمدى بويجەتكەن، اتا-اناسىنىڭ قارسىلىعىنا قاراماستان، بيدەن ءدارىس بەرەتىن رادجا ەسىمدى جىگىتكە عاشىق بولادى. قوس عاشىق جاسىرىن ۇيلەنىپ، شاڭىراق كوتەرەدى. الايدا، كەنەتتەن ءبارى دە وزگەرەدى. ءسۇيىپ قوسىلعان كۇيەۋى تانىماستاي وزگەرىپ، حۋشي دالادا قالادى. ۋاقىت وتە جاقىندارىنىڭ قولداۋىمەن بويجەتكەن الماتىعا كەلىپ، جۇمىسقا ورنالاسىپ، بيىكتەردەن كورىنەدى.
Khushi Motion Picture - 2012-جىلى ءۇندى كينوگەرى بحۋشان شارما نەگىزىن قالاعان بولليۆۋدتىڭ ءىرى كومپانيالارىنىڭ ءبىرى. بۇگىندە كومپانيادا ءۇندىستان كينەماتوگرافياسىندا تانىمال جازۋشىلار، تەحنيكا ماماندارى، اكتەرلەر مەن پروديۋسەرلەر، رەجيسسەرلەر مەن مۋزىكانتتار جۇمىس ىستەيدى.
