پرەزيدەنت ءبىر كۇندە ءتورت بىردەي مينيستردى جۇمىستان بوساتتى

مۇنداي شەشىمدى تۇرىكمەنستان باسشىسى ون ءبىر ايدىڭ قورىتىندىسى بويىنشا وتكەن ۇكىمەت وتىرىسىندا قابىلدادى، دەپ حابارلايدى قازاقپارات «تۇرىكمەنستان بۇگىن» اقپارات اگەنتتىگىنە سىلتەمە جاساپ.

اتاپ ايتقاندا، وزدەرىنە جۇكتەلگەن مىندەتتى دۇرىس ورىنداماعانى ءۇشىن ونەركاسىپ ءمينيسترى امانبەردي تۋيليەۆ، ەڭبەك جانە حالىقتى الەۋمەتتىك قورعاۋ ءمينيسترى ءارى زەينەتاقى قورىنىڭ باسشىسى سەيتماممەد اكماممەدوۆ، تەمىرجول كولىگى ءمينيسترى دەرياگۋلى بياشيموۆ، سونداي-اق اۋىل مەن سۋ شارۋاشىلىعى ءمينيسترى نۋرساحەد ساپاردۋردىيەۆ لاۋازىمدارىنان بوساتىلدى.

ۇكىمەت وتىرىسى كەزىندە اتالعان ۆەدومستۆولاردا قىزمەت بابىن اسىرا پايدالانۋ، پارا بەرۋ، جەمقورلىق پەن مەملەكەت قارجىسىن جىمقىرۋ ارەكەتتەرىنىڭ انىقتالعانى دا جاريالاندى.

بۇدان بولەك، جۇمىستا جىبەرىلگەن ولقىلىقتار ءۇشىن ۆيتسە-پرەمەر گوچمىرات مىرادوۆ، ەنەرگەتيكا ءمينيسترى چارىمىرات پۋرچەكوۆ، ساۋدا جانە سىرتقى بايلانىس ءمينيسترى دوۆرانۋ ورازمىرادوۆ، مۇناي وڭدەۋ زاۋىتتارىنىڭ باس ديرەكتورى دوۆلەتمىرات بياشيموۆ جانە تاعى باسقا لاۋازىمدى تۇلعالار قاتاڭ سوگىس الدى. سوڭعى ەسكەرتۋ العاندار دا بار.