بۇگىن - نۇرسۇلتان نازاربايەۆ تۇڭعىش پرەزيدەنت رەتىندە انت قابىلداعان كۇن
اتالعان قۇجاتقا سايكەس جاڭا قۇرىلعان تاۋەلسىز مەملەكەت قازاقستان رەسپۋبليكاسى دەپ اتالدى. ءدال وسى كۇنى سودان ونشاقتى كۇن بۇرىن عانا وتكەن سايلاۋدا حالىقتىڭ 98,8 پايىز داۋىسىنا يە بولعان نۇرسۇلتان نازاربايەۆتى مەملەكەت باسشىسى رەتىندە ۇلىقتاۋ ءراسىمى ءوتتى.
سالتاناتتى شارا سول كەزدەگى ەلىمىزدىڭ ەلورداسى الماتى قالاسىنداعى رەسپۋبليكا سارايىندا ۇيىمداستىرىلدى. قازاقستان پرەزيدەنتى انت بەرەتىن مىنبەنىڭ استىنا ەشكىمنىڭ اياعى تيمەگەن، ەشكىم باسپاعان اق كىلەم توسەلدى. مەملەكەت باسشىسىنىڭ يىعىنا شاپان جابىلدى. سول تۇستا جاسى 90 نان اسقان حالىق اقىنى شاكىر ابەنوۆ باتا بەرىپ، حالقىمىزدىڭ كورنەكتى قالامگەرى، قوعام قايراتكەرى ءابىش كەكىلبايەۆ تىلەك ايتتى.
ەلباسى انت بەرگەن سوڭ 20 دۇركىن وتشاشۋ بولىپ، رەسپۋبليكا سارايىنىڭ تۇبىندە اقسارباس شالىندى.
وسى رەتتە قازاقستان پرەزيدەنتىنىڭ تۇڭعىش ۇلىقتاۋ ءراسىمىن كورنەكتى قوعام قايراتكەرى، عالىم مىرزاتاي جولداسبەكوۆتىڭ ۇيىمداستىرعاندىعىن اتاپ وتكەن ءجون. ول ءدال سول كۇنگى شارانى قالاي ۇيىمداستىرىپ، قالاي وتكەندىگىن، قانداي توسىن جايتتار ورىن العاندىعىن بولات بوداۋبايدىڭ سىر-سۇحباتقا قۇرىلعان «تاڭعالامىن ءومىردىڭ عاجابىنا» اتتى رومانىندا كەڭىنەن بايانداپ بەرگەن ەدى.
«يناۋگۋراتسيا ءراسىمى اياقتالىپ كەلە جاتتى. ءبارى دە جينالعان جۇرتتىڭ كوكەيىنەن شىققانداي بولدى. ءسويتىپ تۇرعاندا... سول ءساتتى ەسىمە السام، ءالى دە جۇرەگىم اتقاقتاپ سوعا جونەلەدى. ءيا، ءسويتىپ تۇرعاندا ساحنا تورىندە مەملەكەتتىك تۋدىڭ قۇلاپ كەتكەنى.
كوز الدىمدا قيسايىپ بارا جاتىر... كەنەت، و قۇدىرەت، الگى قۇلاپ بارا جاتقان تۋدى پرەزيدەنت ءبىر قولىمەن قاعىپ العانى!.. تۋ سىرتىندا تۇرعان تۋدىڭ قۇلاپ بارا جاتقانىن قالاي كورىپ قالعانى، سونى قالاي ۇستاپ ۇلگەرگەنى تاڭ قالارلىق.
ال ەندى وسى جاي ادامنىڭ ءىسى مە؟ جوق، بۇل جاي ادامنىڭ ءىسى ەمەس. سول وقيعانىڭ سيمۆولدىق ءمانى بار سياقتى بولادى دا تۇرادى ماعان. نۇرسۇلتان نازاربايەۆ شىنىندا دا، قازاقتىڭ جىعىلا جازداعان تۋىن قايتا تىككەن ازامات. ءسوز رەتى كەلىپ تۇرعاندا ايتىپ قالايىن، سالتاناتتى ءراسىم بىتكەننەن كەيىن «مىنالارىڭ نە، دۇرىستاپ قارامايسىڭدار ما؟» دەپ ءبىر اۋىز سوزگە بارمادى.
سوڭىرا انىقتادىق، ساحنا شىمىلدىعىن جاباتىن تۇستا جىلدامدىق ارتىق قويىلىپتى دا، اۋىر شىمىلدىقتىڭ سامال لەبى تۋتۇعىردى قوزعاپ جىبەرگەن ەكەن»، - دەپ ەسكە الادى قوعام قايراتكەرى مىرزاتاي جولداسبەكوۆ سول روماندا.
