ەسكەندىر يبراگيم: ەندى كوك تۋدى كاسىپقوي بوكستا جەلبىرەتەمىن

كەشەدەن بەرى وتاندىق ب ا ق وكىلدەرى «ەسكەندىر يبراگيم كاسىپقوي بوكسقا اۋىسىپتى» دەپ جارىسا جازدى. بۇل اڭگىمەنىڭ انىق- قانىعىن ءبىلۋ ءۇشىن قازاقپارات ءتىلشىسى ءانشىنىڭ وزىمەن تىكەلەي بايلانىسقا شىعىپ، شاعىن سۇحبات الدى.

- ەسكەندىر ءبىز ءسىزدى ءانشى رەتىندە كەڭىنەن تانيمىز. الايدا، كەشەدەن بەرى « ءسىز كاسىپقوي بوكستا العاشقى ايقاسىن وتكىزگەلى جاتىر» دەگەن اڭگىمەلەر جەلدەي ەسىپ جاتىر. بۇل قانشالىقتى راس؟

- ءيا، بۇل اقپاراتتىڭ ەش جالعاندىعى جوق. ءبارى دە راس. اللا قالاسا، ەرتەڭ رەسەي استاناسى ماسكەۋ قالاسىندا كاسىپقوي بوكستاعى العاشقى جەكپە- جەگىمدى وتكىزگەلى جاتىرمىن.

- جەكپە- جەككە قانشالىقتى دايىنسىز؟

- مەن ءان الەمىندە ساحناعا ەشقاشان دايىندىقسىز شىققان ەمەسپىن. ال بۇل شارشى الاڭ، رينگ. ونىڭ ۇستىنە العاشقى ايقاسىم بولعاندىقتان ۇلكەن دايىندىقپەن شىققالى وتىرمىن.

- قارسىلاسىڭىز كىم؟ ول تۋرالى جاقسى بىلەسىز بە؟

- مەن ونىڭ م م ا- دان (ارالاس جەكپە- جەك - اۆت. ) الەم چەمپيونى ەكەنىن جاقسى بىلەمىن. وڭاي جەڭىلەتىن قارسىلاس ەمەس. ءبىراق، قازاق ەجەلدەن جاۋىنگەر حالىق ەكەنىن سىزدە جاقسى بىلەسىز. ەشكىمنەن قايمىعايىن دەپ تۇرعان جوقپىن.

- قاي ەلدىڭ بوكسشىسى؟

- قىرعىزستاندىق شەرعازى ساقتانوۆ دەگەن بوكسشى.

- قاي سالماقتا سىنعا تۇسەسىز؟

- 168 فۋنتتا (76,2 ك گ - اۆت. ) جۇدىرىقتاسامىن.

- وسىعان دەيىن بوكسپەن اينالىسىپ كورگەن بە ەدىڭىز؟

- ءيا، 2001 -جىلدان باستاپ، 2007 -جىلعا دەيىن كاسىبي تۇردە بوكسپەن اينالىستىم. ول كەزدە اتاقتى بوكسشى امانجول باقايەۆ دەگەن اعامىز جاتتىقتىرعان بولاتىن. الايدا، وسى 2007 -جىلى جاتتىعۋ بارىسىندا اۋىر جاراقات الىپ، انام سپورتپەن اينالىسپاۋعا كەڭەس بەردى. سودان كەيىن بوكستان قول ءۇزىپ كەتتىم. الايدا، قازىرگە دەيىن اپتاسىنا ءۇش رەت جاتتىعۋ زالىنا بارىپ، جاتتىعۋىمدى جالعاستىرىپ كەلدىم. جالپى فورمامدى ساقتادىم.

- رينگكە قايتا ورالۋىڭىزعا نە سەبەپشى بولدى؟

- اقتوبەدە ءبىر جاتتىعۋ كەزىندە قازاقتىڭ ماقتان تۇتار ازاماتتارىنىڭ ءبىرى، بەلگىلى بوكسشى جالعاس توكەشوۆ دەگەن اعامىز ماعان بوكسقا قايتا ورالۋىمدى ءوتىندى. مۇمكىن سول كەزدە مەنىڭ ءبىر مۇمكىندىكتەرىمدى بايقاپ قالعان سياقتى. سودان كەيىن، ءوزىم ىشتەي دايىندالىپ، جاتتىعۋعا ءبىرجولا بەت بۇردىم.

- وسى جەكپە- جەگىڭىزگە قايدا دايىندالدىڭىز، كىمدەر جاتتىقتىردى؟

- بۇل جەكپە- جەككە بەلگىلى بوكسشى بوبىرجان مومىنوۆ دەگەن دوسىم جاتتىقتىردى. ەستەرىڭىزدە بولسا مومىنوۆ ساۋل «كانەلو» الۆارەستىڭ گەننادي گولوۆكينگە قارسى جەكپە- جەگى الدىندا وعان سپاررينگ قارسىلاس بولعان ەدى. جاقىندا ول استاناعا كەلىپ ماعاندا قولۇشىن بەردى. سونىمەن قاتار دانابەك سۋجانوۆ، باقىتجان قوجابەك سياقتى بوكسشى دوستارىم كومەكتەستى. بارلىعىنا العىس ايتامىن.

- 2007 -جىلدان بەرى تۋرا 10  جىل ءوتىپتى. بابىڭىزعا كەلۋ قيىن بولمادى ما؟

- ارينە، وڭاي ەمەس. ءبىراق، قاجىرلى ەڭبەك ەتە بىلگەن ادامعا قيىن دۇنيە جوق. ماسكەۋگە ۇلكەن دايىندىقپەن كەلدىم. بۇيىرسا، جەڭىسكە جەتەمىن دەگەن ويدامىن.

- العاشقى ايقاسىڭىز ءساتتى وتسە، ءارى قاراي دا وسى كاسىپقوي بوكستى سەرىك ەتىپ قالا بەرەسىز بە؟

- نەگىزى بالا كۇنىمدەگى ارمانىم مىقتى بوكسشى اتانۋ بولاتىن. «يگىلىكتى ءىستىڭ ەرتە- كەشى بولمايدى» دەيدى عوي. اللا ءساتىن سالسا، كورەمىز. قازىر ميلليارد حالقى بار قىتايدا كاسىپقوي بوكستا اتاعى شىققان سپورتشى جوق. ال از عانا قازاقتان قانشاما ماقتان تۇتاتىن مىقتى بوكسشى شىقتى. سوندىقتان مەنەن دە ۇلكەن ءۇمىت كۇتىڭىزدەر.

- ءسىزدى قازاق جۇرتى «كوك تۋدىڭ جەلبىرەگەنى» انىمەن جاقسى تانيدى. ەندى وسى الداعى ايقاستارعا شىعاتىن كەزدە وسى ءاندى شىرقاپ شىعۋ ويىڭىزدا بار ما؟

- ءان الەمىندە كوك بايراعىمدى جەلبىرەتتىم. ەندىگى ماقساتىم - سول كوك تۋىمىزدى كاسىپقوي بوكستا جەلبىرەتۋ. ەگەر ۇيىمداستىرۋشىلار كەلىسىمىن بەرىپ جاتسا، سول انمەن شىعاتىن بولامىن.

- اڭگىمەڭىزگە راحمەت! سىزگە ساتتىلىك تىلەيمىز.. .

اۆتور:

كۇنسۇلتان وتارباي