تۇرمەدەن كەيىنگى ءومىر: اداسقاننىڭ ايىبى جوق - فوتو
استانا. قازاقپارات - استانادا سوتتالعان تاعدىرلار تۋرالى سىر شەرتەتىن «ءوز بوستاندىعىڭا قول جەتكىز» فوتوكورمەسى ۇيىمداستىرىلدى، دەپ حابارلايدى قازاقپارات ءتىلشىسى.
كورمەنى باس پروكۋراتۋرا مەن ەو قازاقستانداعى قىلمىستىق ءادىل سوتتى جەتىلدىرۋ جوباسى (EUCJ) بىرلەسە ۇيىمداستىرعان جانە وندا پروباتسيا قىزمەتى ارقىلى ۇلگىلى تارتىبىمەن، ادال ەڭبەگىمەن بوستاندىققا شىعىپ، قوعامعا بەيىمدەلە بىلگەن سوتتالۋشىلار تۋرالى باياندالادى.
«فوتوكورمە كەيىپكەرلەرىن ءتۇسىرۋ ءۇشىن ورال، سەمەي، قاراعاندى قالالارىنا ساپار شەكتىك. وندا ءبىر كەزدەرى شالىس باسىپ، ءبىراق ءوز قاتەلىگىن مويىنداپ، مەملەكەتتىڭ قولداۋىمەن ومىرلەرىن جاڭا پاراقتان باستاعان ءۇش تاعدىر يەسىن كورسەتتىك. ولاردىڭ قالاي ەڭبەك ەتكەنىن، تۇرمەدەن كەيىنگى ءومىرىنىڭ قالاي ءوتىپ جاتقانىن جازدىق. مۇنداعى ءبىزدىڭ ماقساتىمىز سوتتالعاندار تۋرالى قوعامدا قالىپتاسقان قاساڭ ستەرەوتيپتەردى بۇزۋ ەدى. ولار دا ءسىز بەن ءبىز سەكىلدى قوعامنىڭ تولىققاندى مۇشەلەرى. ەڭ باستىسى، قوعامنىڭ ولاردى قابىلداپ، تۇزەلىپ كەتەتىنە سەنۋى قاجەت»، - دەدى فوتوجوبا اۆتورلارىنىڭ ءبىرى، جۋرناليست كسەنيا پريداتچەنكو.
جوبا كەيىپكەرلەرىنىڭ ءبىرى - سەمەي قالاسىنىڭ تۇرعىنى، كوپ بالالى انا انار سۇلەيمەنوۆا. ول الاياقتىق ءۇشىن باس بوستاندىعىنان ايىرىلىپ، التىنشى بالاسىن كولونيادا ومىرگە اكەلگەن. تۇرمەدەگى ەڭبەك جولىن شامالعان اۋىلىندا ايەلدەر كولونياسى جانىنداعى بالالار ۇيىندە بالا باعۋشى بولىپ باستاعان جانە قازىر انار پروباتسيا قىزمەتىنىڭ كۇش سالۋىمەن اسپاز-كونديتەر كۋرستارىنا قاتىسىپ ءجۇر.
ورال قالاسىنىڭ 33 جاسار تۇرعىنى قازىبەك نۇرتازين ءبىر كەزدەرى توناۋ، قورقىتىپ الۋ جانە ادام ۇرلاۋ باپتارىمەن سوتتالعان ەدى. كولونيادا وتكەن ەكى جىل ىشىندە قازىبەك كەرامزيت بلوكتارىن، ساقينالار مەن مەتالل كونسترۋكسيالارىن ءوندىرۋ بويىنشا بيزنەس اشقان. ءوز كاسىپورنىنا جيىرمادان استام ادامدى جۇمىسقا العان. قازىر ءۇي سالىپ، اۆتوبۋستار مەن كاماز كولىكتەرىن جالعا بەرۋمەن اينالىسادى.
قاراعاندىلىق الەكساندر نەكراسوۆ بولسا ۇيىمداسقان قاراقشىلىق ءۇشىن تەمىر تورعا جابىلعان. كولونيادا اعاش ۇستاسىنىڭ كومەكشىسى بولىپ جۇمىس ىستەپ، دانەكەرلەۋ كاسىبىنىڭ قىر- سىرىن مەڭگەرگەن. پروباتسيا قىزمەتى ارقىلى گاز- ەلەكتر دانەكەرلەۋشى ماماندىعى بويىنشا قىسقا مەرزىمدى كۋرستاردى اياقتاعان. قازىر «اسپاپ» كووپەراتيۆىندە جۇمىس ىستەيدى.
فوتوكورمە قازاق گۋمانيتارلىق زاڭ ۋنيۆەرسيتەتىنە قويىلعان جانە 16 -جەلتوقسانعا دەيىن جالعاسادى.
