انتاليادا قانشا قازاقستاندىق دەمالدى

بۇل تۋرالى انتاليا گۋبەرناتورلىعى مادەنيەت جانە تۋريزم باسقارماسىنىڭ باسشىسى يبراھيم ادجار ءمالىم ەتتى، دەپ حابارلايدى قازاقپارات ءتىلشىسى.

«قازاقستاننان 2013 -جىلى 260 مىڭ تۋريست كەلسە، 2014-تە 269 مىڭ ادام، 2015 -جىلى 268 مىڭ، 2016 -جىلى رەسەيمەن اراداعى وقيعاعا بايلانىستى 125 مىڭ دەمالۋشى كەلدى. بيىل، 2017 -جىلدىڭ قاراشا ايىنىڭ سوڭىنداعى مالىمەت بويىنشا 237 مىڭ ادام قازاقستاننان كەلدى. بۇل بىلتىرعى كورسەتكىشكە قاراعاندا 88 پايىزعا ارتقان. بيىل ەڭ كوپ تۋريست رەسەيدەن كەلدى. سوسىن، گەرمانيا، ءۇشىنشى ۋكراينا، ودان كەيىن انگليا، ودان كەيىن قازاقستان تۇر»، - دەدى يبراھيم ادجار.

يبراھيم ادجار قازاقپارات تىلشىسىمەن بولعان سۇحباتتا قازاقتاردى انتاليالىقتار باۋىرلارى رەتىندە قارسى الاتىنىن ايتتى.

«تۋريزم سالاسىندا قازاقستانمەن بايلانىستارىمىز بار. ءبىز ولاردى باۋىرلارىمىز دەپ سانايمىز. انتاليا قالاسىندا تۋريزم سالاسىندا وتەتىن كورمەلەرگە قازاقستاندىق كومپانيالار بەلسەندى قاتىسادى. قازاقستاننان كەلەتىن تۋريستەر العاشقى بەستىككە كىرەدى. تۋريزم سالاسىندا تۇركيادا ىستانبۇل مەن انتاليانى اتاۋعا بولادى. جالپى، 2014 -جىلى انتالياعا 12 ميلليون تۋريست كەلدى. 2016 -جىلى رەسەيمەن ارادا سىزات تۇسكەندە 6,5-7 ميلليون تۋريست كەلسە، بيىل كەلۋشىلەردىڭ سانى 10 ميلليوننان استى. انتاليادا تۋريستەر ءۇشىن ارنايى 625000 ورىن بار. انتاليادا 1 مىڭعا جۋىق «جۇلدىزدى» وتەلدەر بار. ونىڭ 400 ى «5 جۇلدىزدى» قوناق ءۇي. مىسالى، يسپانيانىڭ وزىندە 400 «5 جۇلدىزدى» وتەل جوق. انتاليادا 640 شاقىرىمدىق جاعالاۋ، 1650 تۋريستىك اگەنتتىگى بار. جاز ماۋسىمىندا 3 مىڭنان استام گيدتەر جۇمىس ىستەيدى. تۋريزم سالاسىنداعى حالىقارالىق ۇيىمداردىڭ انىقتاۋى بويىنشا انتاليادا 200 گە جۋىق «كوگىلدىر بايراق» دەپ اتالاتىن تازا، سەنىمدى سۋعا شومىلۋعا ارنالعان جاعالاۋلار بار. وندا ادامدار ەركىن، ءقاۋىپسىز دەمالا الادى. انتاليادا 1000-عا جۋىق ەجەلگى قالا بار. ءبىزدىڭ نەگىزگى مىندەتىمىز - شەتەلدىكتەرگە جاعداي جاساۋ»، - دەدى يبراحيم ادجار.

انتاليا قالاسى مادەنيەت جانە تۋريزم باسقارماسىنىڭ باسشىسى ءبىر تۋريست شامامەن قانشا اقشا جۇمسايتىنىن ايتتى.

«ءبىر تۋريست انتاليادا دەمالۋعا شامامەن 700 دوللار اقشا جۇمسايدى. گولف ويناۋعا، 5 جۇلدىزدى قوناق ۇيگە دەمالۋعا كەلگەندەر ودان دا كوپ اقشا قالدىرادى. انتاليادا تۋريزم سالاسىندا قولدانىلاتىن ازىق-تۇلىكتەن باستاپ، بارلىق قاجەتتى زاتتار تۇركيادا جاسالعان. 98 پايىز جەرگىلىكتى ءونىم پايدالانىلادى. جالپى تۇركيا بويىنشا جىلىنا 35 ميلليون تۋريست كەلەتىن بولسا، سونىڭ 65 پايىزى انتاليادا دەمالادى. تۋريستەر كەم دەگەندە 1 اپتاعا كەلەدى. تۋريستەرگە جاز ماۋسىمىندا قىزمەت كورسەتەتىن 200 مىڭعا جۋىق ادام جۇمىسپەن قامتىلادى»، - دەدى ول.

ايتا كەتەيىك، بۇل كۇندەرى قازاقستان- تۇركيا ديپلوماتيالىق قاتىناستارىنىڭ 25 جىلدىعى جانە قازاقستان تاۋەلسىزدىگىنىڭ 26 جىلدىعىنا وراي تۇركيا رەسپۋبليكاسىندا قازاقستان جۋرناليستەرىنىڭ باسپا ءسوز تۋرى وتۋدە. تۋر اياسىندا جۋرناليستەر انكارا قالاسىندا 25 جىلدىققا وراي ۇيىمداستىرىلعان سالتاناتتى جيىن مەن عىلىمي كونفەرەنسياعا قاتىستى. وسىدان كەيىن انتاليا قالاسىنداعى تۋريزيم وشاقتارىن ارالاپ كوردى. باعدارلاما بويىنشا قازاق جۋرناليستەرى گازيانتەپ قالاسىنداعى سيريالىق بوسقىنداردىڭ لاگەرىنە بارىپ، ولاردىڭ جاعدايىمەن تانىسادى دەپ جوسپارلانعان.