اسەت يسەكەشيەۆ ەلورداداعى جابىق بۋلۆاردىڭ قانداي پايدا اكەلەتىندىگىن ايتتى
«بۇل جوبا تەك قانا جەكە ينۆەستيتسيالاردىڭ ەسەبىنەن جۇزەگە اسىرىلادى. ازىرشە جوبا ۇستىندە جۇمىستار، ەسەپتەۋلەر ءجۇرىپ جاتىر. وعان شەتەلدىك ينۆەستورلار قاتىسادى. جۇمىس اياقتالمايىنشا ەگجەي- تەگجەيلى ايتا المايمىز. ءبىز ءۇشىن جوبانىڭ ءمانى ساۋلەتكەرلىك اسەمدىكپەن عانا شەكتەلمەيدى، ول جاڭا جۇمىس ورىندارىن اشۋعا، ساۋدانىڭ جەكە بيزنەسىن جۇرگىزۋگە مۇمكىندىك بەرەدى»، - دەدى ول جۋرناليستەرگە جالپى ۇلتتىق تەلەكوپىر باستالاردىڭ الدىندا.
بۇرىن استانا اكىمدىگى «نۇرلى جول» جابىق بۋلۆارىنىڭ قۇرىلىسىنا ينۆەستورلار ىزدەۋدى باستايتىنى حابارلانعان بولاتىن. ول ءۇشىن ينۆەستيتسيالاردى تارتۋ بويىنشا بۇكىل الەمدىك ناۋقان وتكىزۋ جوسپارلانعان. جابىق بۋلۆاردىڭ جوباسى قازاقستان پرەزيدەنتى نۇرسۇلتان نازاربايەۆقا بىرىككەن اراب امىرلىگىنىڭ ينۆەستورلارىمەن كەزدەسۋ كەزىندە ۇسىنىلدى. يدەيا اۆتورلارىنىڭ ويىنشا، بۇكىل بۋلۆاردىڭ ۇستىنە شاتىر جابىلىپ، قولايلى ميكروكليمات قالىپتاستىرۋى ءتيىس.
