تەلەكوپىر: ەسكى كولىكتەردى وڭدەيتىن قازاقستانداعى تۇڭعىش زاۋىت اشىلدى

استانا. قازاقپارات - استانادا ءوتىپ جاتقان «جاڭا يندۋستريالاندىرۋ: قازاقستاندىق بارىستىڭ قادامى» ۇلتتىق تەلەكوپىرى بارىسىندا ەلباسى نۇرسۇلتان نازاربايەۆ قاراعاندى وبلىسىنداعى ەسكى كولىكتەردى وڭدەۋمەن اينالىساتىن زاۋىتتى ىسكە قوستى،

 دەپ حابارلايدى قازاقپارات.

«Recycling Company» ج ش س قامقورشىلىق كەڭەسىنىڭ مۇشەسى ايدىن نۇراحمەتوۆتىڭ سوزىنە قاراعاندا، بۇل - قازاقستانداعى ەسكى كولىكتەردى وڭدەۋگە ارنالعان العاشقى زاۋىت. ونى تەك 9 ايدىڭ ىشىندە تولىق ىسكە قوسۋعا مۇمكىن بولدى.

«جوعارى تەحنولوگيالىق جابدىقتار جىلىنا توزىعى جەتكەن 50 مىڭ اۆتوكولىكتى وڭدەۋگە مۇمكىندىك بەرەدى. وسى ورايدا 20 مىڭ توننادان استام قارا ءارى ءتۇستى مەتالل وندىرۋگە جول اشىلماق. بارلىق تەحنولوگيالىق ۇدەرىس قورشاعان ورتاعا زيانىن كەلتىرمەيدى. پرەزيدەنت مىرزا، ءبىز ءوڭىر مەن بارشا ەلدىڭ دامۋى ءۇشىن ەلەۋلى ۇلەس قوسۋعا ۋادە بەرەمىز. ءوندىرىستى ىسكە قوسۋعا رۇقسات بەرىڭىز!»، - دەدى ا. نۇراحمەتوۆ.

ءوز كەزەگىندە پرەزيدەنت نۇرسۇلتان نازاربايەۆ ەلىمىز جولدارىنداعى اۆتوكولىكتەر سانى ەلەۋلى تۇردە ارتقانىن ايتا كەلە، سونداي- اق ولار توزعان كەزدە وڭدەيتىن ءتيىستى ءوندىرىس قاجەت بولعانىن جەتكىزدى.

«بۇنداي ءوندىرىس بولماسا، ەسكىرگەن كولىكتەر قورشاعان ورتاعا زيانىن تيگىزەدى. سوندىقتان بۇل زاۋىت مەتالداردى قايتا وڭدەۋگە مۇمكىندىك بەرەدى. بۇگىندە ەلىمىزدە جەڭىل اۆتوكولىكتىڭ 18 ءتۇرى وندىرىلەتىنىن ەسكەرسەك، سىزدەردىڭ جۇمىستارىڭىزدىڭ بولاشاعى زور»، - دەدى ەلباسى.

اۆتور: رۋسلان عابباسوۆ