بىلەكتىڭ كۇشىمەن ەمەس، اقىلمەن اقشا تابۋدى ۇيرەنەيىك - نازاربايەۆ

استانا. قازاقپارات - بىلەكتىڭ كۇشىمەن كەندى قازىپ، دالاعا شىعاراتىن قازاق بولماي، اقىلمەن اقشا تابۋدىڭ جولىنا تۇسەيىك.

بۇل تۋرالى بۇگىن «جاڭا يندۋستريالاندىرۋ: قازاقستاندىق بارىستىڭ قادامى» ۇلتتىق تەلەكوپىرى بارىسىندا مەملەكەت باسشىسى نۇرسۇلتان نازاربايەۆ ايتتى، دەپ حابارلايدى قازاقپارات.

«يندۋستريا، يننوۆاتسيا دەگەن نارسە اركىم «جاسايمىن» دەگەننەن كەيىن جاسالمايدى. ول ءۇشىن ءتيىستى قاراجات كەرەك. ول ءۇشىن ماماندار كەرەك. ول ءۇشىن مەملەكەت دايىن بولۋى كەرەك. مىنەكەي، ءبىز 2010-جىلى عانا دايىن بولدىق. 2008-2009-جىلدارداعى دۇنيەجۇزىلىك داعدارىستان، قارجى داعدارىسىنان، ەكونوميكالىق داعدارىستان شىقتىق. مۇنايدىڭ باعاسى باررەلىنە 10 دوللارعا تۇسكەنىن دە كوردىك. ول ارى-بەرى اۋىتقىپ تۇراتىندىعىن دا كوردىك. شيكىزات باعاسىنىڭ ءبىر ورىندا تۇرمايتىندىعىن، كەيدە كوتەرىلەتىندىگىن، كەيدە تۇسەتىندىگىن كوردىك. ال ادامنىڭ ءومىرى ونداي ەمەس قوي. بۇگىن ءبىز حالىققا، مىسالى 300 مىڭ تەڭگە جالاقى تولەيتىن بولساق، ەرتەڭگى كۇنى «مۇنايدىڭ باعاسى تومەندەدى» دەپ 100 مىڭ تەڭگە بەرە المايمىز عوي. زەينەتاقى دا سولاي. «مۇناي تومەندەپ كەتتى، سەندەرگە زەينەتاقىنى ءۇش ەسە ازايتىپ بەرەمىز» دەپ ايتا المايمىز»، - دەدى قازاقستان پرەزيدەنتى.

سوندىقتان مەملەكەت باسشىسى مۇناي مەن گازدىڭ اۋمالى-توكپەلىلىگىن تومەندەتۋ ءۇشىن نە ىستەۋ كەرەكتىگىن ايتتى.

«بۇكىل الەمدەگى سياقتى ەكىنشى ەكونوميكا جاساۋىمىز كەرەك. وزدەرىڭىز قاراپ وتىرساڭىزدار، الدىڭعى قاتارلى مەملەكەتتەردە، وڭتۇستىك كورەيادا مۇناي مەن مەتالل تۇرماق 1 ءتۇيىر كومىر دە جوق. سينگاپۋردا قانداي كومىر، تەمىر، مۇناي-گاز بار؟ شۆەيتساريادا، گەرمانيادا نە بار؟ ءبىراق اقىلمەن، ويمەن الدىڭعى قاتارلى ەلدەردىڭ لەگىندە بولدى. سوندىقتان ءبىز بىلەكتىڭ كۇشىمەن جەردى قازىپ، قوپارىپ، كەندى دالاعا شىعاراتىن قازاق بولماي، جۇرت سياقتى اقىل-ويمەن، پاراساتپەن اقشا تابۋىمىز كەرەك. مەن كورگەن يزرايلدە، تەل-اۆيۆتە تۇرعان زاۋىت وسى ءبىز وتىرعان كىشەنتاي زال سياقتى. جىل سايىن 10 ميلليارد دوللار اقشا تابادى... ءبىز كەڭ دالامىزدا كەننىڭ ءبارىن قازىپ، شىعارىپ، قاتىرىپ جاتىرمىز دەپ ويلايمىز. سوندىقتان ءبىز قيىن بولسا دا يندۋستريالىق باعدارلامانى قولعا الدىق. بۇل ءبىزدىڭ بولاشاعىمىز. بۇل - ەلىمىزدىڭ وركەندەگەن مەملەكەتتەر قاتارىنا قوسىلۋ جولى. بۇل - ءبىزدىڭ كادرلاردى دايىنداۋدىڭ ماسەلەسى. ەندەشە، جاستاردى باسقاشا جۇمىس ىستەۋگە دايىنداۋ كەرەك. ءبىر سوزبەن ايتقاندا، بۇل - قازاقتىڭ بولاشاعى. وسىنى ەسكە الىپ، جولعا ءتۇسۋىمىز كەرەك. ءبىراق نە بولسا سونى جاساماي، كەرەكتى، باسەكەگە قابىلەتتى دۇنيەلەردى شىعارۋىمىز قاجەت»، - دەدى نۇرسۇلتان نازاربايەۆ.