تەلەكوپىر: قىتاي مەن وزبەكستانعا گاز ەكسپورتى ارتادى

استانا. قازاقپارات - استاناداعى جالپى ۇلتتىق تەلەكوپىر بارىسىندا ەلباسى نۇرسۇلتان نازاربايەۆ اقتوبە وبلىسىنداعى «بوزوي» قويماسىندا گازدى كەپتىرۋ قوندىرعىسىن ىسكە قوستى، دەپ حابارلايدى قازاقپارات.

«قۇرمەتتى ەلباسى! وسى جوبانىڭ ارقاسىندا رەسەي، قىتاي، وزبەكستانعا تاسىمالداناتىن ترانزيتتىك جانە ەكسپورتتىق گازدىڭ كولەمى ارتادى. «بوزوي» جەراستى گاز قويماسى - ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتۋدە ستراتەگيالىق ماڭىزى بار. جاڭا قوندىرعى ونىمدىلىكتى ارتتىرىپ، تاۋلىگىنە 27 ميلليون تەكشە مەترگە جەتكىزبەك. بۇل باتىس پەن وڭتۇستىكتەگى قازاقستاندىق تۇتىنۋشىلاردى گازبەن ۇزدىكسىز قامتاماسىز ەتۋگە مۇمكىندىك بەرەدى. نۇرسۇلتان ءابىش ۇلى، ىسكە قوسۋعا رۇقسات ەتىڭىز!»، - دەدى «قاز مۇناي گاز» ۇ ك» ا ق اعا ۆيتسە-پرەزيدەنتى يبۋللا سەرديەۆ.

ءوز كەزەگىندە مەملەكەت باسشىسى نۇرسۇلتان نازاربايەۆ ەل ءۇشىن بۇل وتە ماڭىزدى جوبا ەكەنىن، ەلىمىزدىڭ وڭىرلەرىن گازبەن قامتاماسىز ەتۋدە ۇلكەن جوبالار ىسكە اسىرىلىپ جاتقانىن اتاپ ءوتتى.

«وندىرىستەرىڭىز تابىستى بولسىن. ىسكە قوسىڭىزدار!»، - دەدى پرەزيدەنت.

ايتا كەتەيىك، استانادا مەملەكەت باسشىسىنىڭ قاتىسۋىمەن «جاڭا يندۋستريالاندىرۋ: قازاقستاندىق بارىستىڭ قادامى» ۇلتتىق تەلەكوپىرى ءوتىپ جاتىر. شارا بارىسىندا ونلاين- رەجيمىندە بۇكىل ەل بويىنشا جاڭا يندۋستريالىق-يننوۆاتسيالىق، ينفراقۇرىلىمدىق، ەنەرگەتيكالىق، اگروونەركاسىپتىك جوبالار ىسكە قوسىلۋدا.