استانالىق شەنەۋنىكتەر تاكسيمەن جۇرەتىن بولدى
استانا. قازاقپارات - قىزمەتتىك كولىكتىڭ ورنىنا تاكسي! استانا اكىمى اسەت يسەكەشوۆ كەلەر جىلدان باستاپ قالا اتقامەنەرلەرىن تۇگەلدەي تاكسيگە وتىرعىزباقشى، - دەپ جازدى ك ت ك ارناسى.
ياعني، اكىمدىك قىزمەتتىك ماشينالاردان باس تارتىپ جاتىر.
يسەكەشوۆتىڭ ايتۋىنشا، بۇل الدەقايدا ءتيىمدى ەكەن. ياعني، قىمبات كولىك ساتىپ الىپ، جۇرگىزۋشىلەرگە جالاقى تولەگەنشە، تاكسي قىزمەتىنە جۇگىنگەن دۇرىس دەيدى اكىم. ازىرگە، بۇل جاڭا جىلدان باستاپ پيلوتتىق جوبا رەتىندە ىسكە اسپاقشى.
ءبىراق، ەلوردالىق شەنۋنىكتەردى تاسۋعا قاۋقارلى تاكسي كومپانياسى جوق ەكەن. كوبىنىڭ اۆتوپاركىندە كولىك جەتىسپەيدى. سوندىقتان، جوبانى ىسكە اسىرۋدا ءبىراز قيىندىقتار بار دەيدى يسەكەشوۆ.
