مۇحامەدي ۇلى: «قازاقستاننىڭ حالىق ءارتىسى» اتاعىن قايتارۋ كەرەك
دەپ حابارلايدى قازاقپارات ءتىلشىسى.
ۇكىمەت ساعاتىندا ق ر پارلامەنتى ءماجىلىسىنىڭ دەپۋتاتى نۇرلان دۋلاتبەكوۆ «حالىق ءارتىسى» جانە «ەڭبەك سىڭىرگەن ءارتىس» اتاقتارىنىڭ جويىلىپ، «ەڭبەك سىڭىرگەن قايراتكەر» اتاعى عانا قالۋى سالدارىنان «قايراتكەرلەردىڭ» كوبەيىپ كەتكەنى تۋرالى ماسەلە كوتەردى.
«ەڭبەك سىڭىرگەن قايراتكەر اتاعىن ارتىستەر دە، دارىگەرلەر دە، اگرونومدار دا الا بەرەدى - ءبارى قازاقستاننىڭ ەڭبەك سىڭىرگەن قايراتكەرلەرى. «قازاقستاننىڭ حالىق ءارتىسى» جانە «ەڭبەك سىڭىرگەن ءارتىس» اتاقتارىن قايتارۋ قاجەت. قازىرگى ۋاقىتتا ەلىمىزدە ك س ر و ءۇش حالىق ءارتىسى قالدى - بيبىگۇل تولەگەنوۆا، اسانالى ءاشىموۆ جانە الىبەك دىنىشيەۆ. جاقىن ارادا ساحنادا مەتر مەن جاس تالانت قاتار تۇراتىن جانە ەكەۋىندە دە بىردەي «ەڭبەك سىڭىرگەن قايراتكەر» اتاعى بولاتىن ۋاقىت كەلەدى. ياعني، ارا سالماق جوعالىپ بارا جاتىر»، - دەپ جاۋاپ بەردى ارىستانبەك مۇحامەدي ۇلى دەپۋتاتتىڭ كوتەرگەن ماسەلەسىنە وراي.
ونىڭ ايتۋىنشا، «حالىق ءارتىسى» جانە «ەڭبەك سىڭىرگەن ءارتىس» اتاقتارى جوق دەپ، ا ق ش- تى ۇلگى ەتەتىندەر جەتەرلىك.
«ءبىراق، ولاردا «گرەممي» لاۋرەاتى، «وسكار» لاۋرەاتى، پۋليتتسەر جۇلدەسى سىندى وزگە ساناتتار بار جانە وسى ماراپاتتار ارقىلى قوعامداعى ەلەۋلى تۇلعالارعا اينالۋ مۇمكىندىگى بار. بىزدە «وسكار» سىندى بەدەلدى جۇلدە جوق جانە ەنگىزۋدىڭ دە قاجەتى جوق. بىزدەگى سانات باسقا. ارينە، ماسەلە وزەكتى. بولاشاقتا سىزدەردىڭ قولداۋلارىڭىزبەن بۇرىن بولعان قۇندىلىقتاردى قايتارا الامىز دەگەن ويدامىن»، - دەدى مينيستر دەپۋتاتتارعا.
ايتا كەتەيىك، قازاقستاننىڭ حالىق ءارتىسى - مۋزىكا مەن حورەوگرافيا، تەاتر مەن كينو، ەسترادا جانە سيرك ونەرىن دامىتۋعا ايرىقشا ۇلەس قوسقان ونەر يەلەرىنە بەرىلەتىن قازاقستاننىڭ قۇرمەتتى اتاعى. 1920 - جىلدارى بەلگىلەنگەن «قازاق ا ك س ر حالىق ءارتىسى» اتاعى العاش 1923 - 1924 -جىلى ا. ۆ. زاتايەۆيچ پەن ن. پ. اننەنقوۆا- بەرنارعا، ال 1931 -جىلى ە. ءومىرزاقوۆ پەن ج. شانينگە بەرىلدى. 1991 -جىلدان «قازاقستاننىڭ حالىق ءارتىسى» دەپ اتالدى. 1999 - جىلدىڭ شىلدە ايىنان باستاپ بۇل اتاقتى بەرۋ توقتاتىلدى.
اۆتور: ايجان سەرىكجان قىزى
