استانا كوندۋكتورلارىنا قاتىستى شاعىم - تارتىپتىك كەڭەس جۇمىس ىستەيدى
استانا. قازاقپارات - استانا قالاسىنىڭ №1 -اۆتوپاركىنىڭ باسشىسى ءسابيت بولاتوۆ ەلوردالىق جۇرگىزۋشىلەر مەن كوندۋكتورلارعا قاتىستى كوبەيىپ كەتكەن شاعىمدارعا جاۋاپ بەردى، دەپ حابارلايدى «قازاقپارات» ح ا ا ءتىلشىسى.
«قوعامدىق كولىكتەرگە شاعىمداردىڭ كوپتەپ ءتۇسىپ جاتاتىنى ءجيى ايتىلىپ جاتادى. الايدا بۇرىن شاعىمدار ديسپەتچەرگە ءتۇسىپ جاتقان كەزدە بار-جوعى بىرنەشە ادام عانا حابارلاسىپ جاتاتىن. ال قازىرگى تاڭدا ءبىز ءبىرىڭعاي ورتالىق جەلىسى ىسكە قوسىلىپ، ونىڭ ءنومىر بارلىق اۆتوبۋستاردا جازىلىپ تۇرعاندىقتان، البەتتە، شاعىمنىڭ سانى ارتادى»، - دەيدى ءسابيت بولاتوۆ.
ونىڭ ايتۋىنشا، بۇل ماسەلەگە قاتىستى جولاۋشىلاردىڭ دا كومەگى كوپ سەپتىگىن تيگىزەدى.
«شاعىمنىڭ كوپ ءتۇسىپ جاتقانى بىزگە دە وڭ اسەرىن بەرەدى. سەبەبى، كۇنىنە 350 اۆتوبۋس جولعا شىعىپ، سونشالىقتى جۇرگىزۋشىلەر مەن كوندۋكتورلار دا جۇمىسقا كىرىسەدى. البەتتە، ونىڭ ءبارىن قاداعالاۋعا مۇمكىندىگىمىز جەتە بەرمەيدى. سول سەبەپتى، جولاۋشىلاردىڭ قاداعالۋى - بىزگە دە ۇلكەن كومەك. كەلىپ تۇسكەن قوڭىراۋلار بويىنشا جۇمىس جۇرگىزىلەدى. بىزدە ونداي ماسەلەلەردى رەتتەپ وتىراتىن ارنايى تارتىپتىك كەڭەستەر بار»، - دەيدى بولاتوۆ.
دەسە دە، ءسابيت بولاتوۆ جۇرگىزۋشىلەر مەن كوندۋكتورلاردىڭ جۇمىسى وتە كۇردەلى ەكەنىن دە ەسكە سالدى.
«ءبىزدىڭ ءبىرىنشى اۆتوبۋستار ساعات تاڭعى بەس كەزىندە جۇمىسقا شىعادى. سوڭعىسى تۇنگى ءبىر كەزىندە جۇمىسىن اياقتايدى. ارينە، كليەنتتىڭ ءۋاجى ءاردايىم ورىندى دەگەنىمىزبەن، جۇرگىزۋشىلەر مەن ماماندار دا ادام ەكەنىن، ولاردىڭ دا وسىنداي ۋاقىتتا شارشايتىنىن ەسكەرۋ كەرەك. جولاۋشىلاردىڭ ارەكەتى ءارقاشان دۇرىس بولا بەرمەيدى»، - دەپ ءتۇيدى استانا قالاسىنىڭ №1-اۆتوپاركىنىڭ باسشىسى.
