استانا تەمىر جول ۆوكزالى تۇراعىنا مينيۆەندەر نەگە كىرگىزىلمەيدى
استانا. قازاقپارات - استانا قالاسىنىڭ جولاۋشىلار كولىگى باسقارماسى تەمىر جول ۆوكزالىنداعى كولىك تۇراعىنا مينيۆەندەردى(شاعىن اۆتوبۋستان كىشىرەك، 6-7 ادامدىق اۆتوكولىكتەر - رەد.) كىرگىزۋگە نەلىكتەن تىيىم سالىنعانىن ءتۇسىندىردى، دەپ حابارلايدى «قازاقپارات» ح ا ا ءتىلشىسى.
«استانانىڭ تەمىر جول ۆوكزالىنىڭ جانىنداعى اقىلى كولىك تۇراعىنىڭ اۋماعىنا كىرۋ نەمەسە شىعۋ ەلوردانىڭ ەسكى ۆوكزالىنداعى ەرەجەلەرگە سايكەس رەتتەلەدى. ول ەرەجەلەر بويىنشا تۇراق قىزمەتىن پايدالاناتىن كولىك قۇرالدارىنىڭ جۇرگىزۋشىلەرىنە ءبىرشاما شەكتەۋلەر قويىلعان»، - دەلىنگەن رەداكسيانىڭ رەسمي ساۋالىنا جاۋاپ بەرگەن باسقارمانىڭ جاۋابىندا.
جۇرگىزىلگەن مونيتورينگكە سايكەس، كولىك تۇراعىنا كىرەتىن مينيۆەندەردىڭ 99 پايىزى قالالار مەن وبلىستارعا جۇرەتىن زاڭسىز تاسىمالداۋشىلار بولىپ تابىلادى.
سونىمەن قاتار، باسقارمانىڭ حابارلاۋىنشا، جولاۋشىلار كولىگى باسقارماسى مەن اكىمشىلىك پوليتسيا باسقارماسى ارنايى تەحنيكا مەن قىزمەت كورسەتەتىن كولىكتەردەن بولەك، «د» كاتەگورياسىنداعى اۆتوكولىكتەردى تۇراق اۋماعىنا كىرۋگە تىيىم سالاتىن جول بەلگىلەرى ورناتىلۋدا.
