ءداستۇرلى انگە دەن قويعان - الەكسەي لودوچنيكوۆ

«مەن كاچير بالالار ءۇيىنىڭ تاربيەلەنۋشىسىمىن. قازىرگى تاڭدا مۋزىكالىق كوللەدجدە وقىپ جاتىرمىن. ومىرلىك تاريحىمنىڭ ءبىر ارتىقشىلىعى - مەن تازا قازاق تىلىندە سويلەي وتىرىپ، دومبىرا شەرتەمىن، ءداستۇرلى اندەردى ورىندايمىن. بۇل مەنىڭ ەلباسىمەن تۇڭعىش كەزدەسۋىم ەمەس. پرەزيدەنتپەن ءار كەزدەسكەن سايىن وزىمە جاڭالىق اشىپ وتىرامىن»، - دەيدى الەكسەي.

الەكسەي ەڭ ءبىرىنشى رەت ەلباسىمەن 2016 -جىلى كەزدەسكەنىن ەسكە الادى. كەزدەسۋدەن كەيىن جاس جىگىتتىڭ ءومىرى كۇرت وزگەرىپ، حالىقارالىق شارالارعا شاقىرتۋ الا باستاعان ەكەن. ەلباسىمەن تۇڭعىش كەزدەسۋى الەكسەيگە كەرەمەت جىگەر سىيلاعان كورىنەدى.

«بۇگىنگى تاڭدا مەن ءوزىمىزدىڭ مۋزىكالىق كوللەدجدە «جاس وتان» جاستار قاناتىنىڭ جەتەكشىسى بولىپ وتىرمىن. بۇل جوبانى ۇيىمداستىرىپ، قاراپايىم ادامداردىڭ باسىن قوسقانى ءۇشىن پرەزيدەنتكە زور العىسىمدى بىلدىرگىم كەلەدى. جوبا جەڭىمپازدارىنىڭ بىرنەشە ءومىر تاريحىن وقىپ ءبىلىپ، ءارقايسىسى شىنىندا دا ەرەكشە نازارعا لايىق ەكەنىنە كوزىم جەتتى. ءبىزدىڭ ەلدەگى جاستار ءۇشىن جوبا جەڭىمپازدارىنىڭ ءومىرى ۇلگى بولار دەگەن سەنىمدەمىن»، - دەيدى ول.

الەكسەي سونىمەن قاتار، ناقتى قاي ۋاقىتتا قازاق ءتىلىن ۇيرەنىپ، ۇلتتىق مۋزىكالىق فولكلوردى مەڭگەرۋگە دەن قويعانىن ايتىپ ءوتتى.

«مەن بالالار ۇيىنە 3 جاسىمدا كەلدىم. سول كەزدە وندا قازاق توبى اشىلعان ەدى. بۇكىل پاۆلودار وبلىسىندا جالعىز قازاق توبى ەكەنىن كەيىن ءبىلدىم. نەگە ەكەنى بىلمەيمىن، سول توپقا ءتۇسىپ، كىشكەنە كەزىمدە- اق قازاق تىلىنە دەگەن ەرەكشە قىزىعۋشىلىعىم وياندى. ارادا ءبىراز ۋاقىت وتكەننەن كەيىن دومبىرا ۇيرەنگىم كەلدى. قازىر قازاقتىڭ ۇلتتىق اندەرىن ورىنداپ ءجۇرمىن»، - دەيدى لودوچنيكوۆ.

ەسكە سالا كەتسەك، بۇگىن ق ر پرەزيدەنتى نۇرسۇلتان نازاربايەۆ «رۋحاني جاڭعىرۋ» باعدارلاماسى اياسىندا ۇيىمداستىرىلعان «100 جاڭا ەسىم» جوباسىنىڭ 102 جەڭىمپازىمەن كەشە كەزدەسكەن بولاتىن. قازاقستاننىڭ تۋىن بيىككە كوتەرگەن سپورتشىلار مەن اق حالاتتى دارىگەرلەر، مەتسەناتتىقپەن كوزگە تۇسكەن بەلدى كاسىپكەرلەر مەن عالىمدار، مادەنيەت پەن قوعامدىق سالادا ەل اۋزىندا جۇرگەن ازاماتتار ەلباسىنىڭ جىلى لەبىزىنە بولەندى.