ەلباسى كوز جانارىنان ايىرىلعان بەلگىلى مۋزىكانتقا تىلەگىن ءبىلدىردى

استانا. قازاقپارات - قازاقستان پرەزيدەنتى نۇرسۇلتان نازاربايەۆ كوزى كورمەسە دە، ونەرىمەن كوپتى ءتانتى ەتىپ جۇرگەن سايدا حالىقوۆاعا ىزگى تىلەگىن ءبىلدىردى، دەپ حابارلايدى «قازاقپارات» ح ا ا ءتىلشىسى.

 سايدا حالىقوۆا پيانينودا ەركىن وينايتىن بىلىكتى مۋزىكانت. يتاليادا «بولاشاق» باعدارلاماسى بويىنشا 3 جىل ءبىلىم العان تالانتتى قىز ەلگە ويلانباي ورالعان ەكەن. بالا كۇنىندە كوزىنە جاسالعان وپەراتسيا سايدانى قوس جانارىنان ايىرعان. سول كەزدەن باستاپ جىگەرى جاسىماعان ول، مۋزىكا الەمىنە قىزىعىپ، كلاسسيكالىق باعىتتاعى شىعارمالاردى تىڭداعان.

تالماي ىزدەنىسىنىڭ ارقاسىندا سايدا 4-سىنىپتا وقىپ جۇرگەندە- اق العاشقى كونسەرتىن بەرگەن ەكەن. قازىر مۋزىكانت جىلىنا 2 رەت شىعارماشىلىق كەشىن ۇيىمداستىرادى. «قازاقستاننىڭ 100 جاڭا ەسىمىنە» ەنگەن مۋزىكانتقا قازاقستان پرەزيدەنتى ىزگى تىلەگىن ءبىلدىردى.

«راحمەت، سايدا! وسى جولمەن جۇرە بەر. سەن قانشا جاسقا ونەگە بولاسىڭ. ادامنىڭ مۇمكىندىگىنىڭ شەكسىز ەكەنىن كورسەتەسىڭ. «باقىتتىمىن» دەدىڭ، باقىتتى بول! ۇزاق عۇمىر تىلەيمىن! ءالى تالاي شىعارمالار جازاسىڭ. قۋانتاسىڭ ءبىزدى...»، - دەپ تىلەك ءبىلدىردى مەملەكەت باسشىسى.

ەسكە سالا كەتسەك، بۇگىن ق ر پرەزيدەنتى نۇرسۇلتان نازاربايەۆ «رۋحاني جاڭعىرۋ» باعدارلاماسى اياسىندا ۇيىمداستىرىلعان «100 جاڭا ەسىم» جوباسىنىڭ 102 جەڭىمپازىمەن كەزدەستى. قازاقستاننىڭ تۋىن بيىككە كوتەرگەن سپورتشىلار مەن اق حالاتتى دارىگەرلەر، مەتسەناتتىقپەن كوزگە تۇسكەن بەلدى كاسىپكەرلەر مەن عالىمدار، مادەنيەت پەن قوعامدىق سالادا ەل اۋزىندا جۇرگەن ازاماتتار ەلباسىنىڭ جىلى لەبىزىنە بولەندى.

اۆتور: ايان بەكەن ۇلى