ەلباسىمەن كەزدەسۋ: ومارتاشى «بالدىڭ باررەلى» اڭگىمەسىمەن جۇرتتى دۋ كۇلدىردى

استانا. قازاقپارات - كەشە ەلباسىمەن وتكەن كەزدەسۋدە اقمولالىق ومارتاشى اناتولي دوبروۆولسكي «بالدىڭ باررەلى» تۋرالى اڭگىمەمەن جۇرتتى دۋ كۇلدىردى،

 دەپ حابارلايدى «قازاقپارات» ح ا ا ءتىلشىسى.

كەزدەسۋدە 33 جاستاعى اناتولي دوبروۆولسكي مەملەكەت باسشىسىنا ومارتا شارۋاشىلىعىمەن اينالىسۋدىڭ دەنساۋلىققا پايداسى تۋرالى ايتىپ بەردى.

«مەن ءوزىمدى دەنىم ساۋ جانە باقىتتى سانايمىن. سۇيىكتى ىسىممەن اينالىسىپ ءجۇرمىن. سوندىقتان، باقىتتىمىن. كۇن سايىن بال جەگەندىكتەن - دەنىم ساۋ. بالدى تۇتىنۋدىڭ ءتارتىبى وتە قاراپايىم. كۇنىنە ەكى قاسىق بال جەيسىز. ياعني بىرەۋىن - تاڭەرتەڭ، ەكىنشىسىن - ۇيىقتار الدىندا. الەمدە ءبىزدىڭ ەلىمىز سياقتى ومارتا شارۋاشىلىعىمەن اينالىسۋعا بىرەگەي تابيعاتى بار نەبارى بەس- التى ەل بار»، - دەدى كاسىپكەر.

اناتولي دوبروۆولسكي ومارتا شارۋاشىلىعىن دامىتۋدىڭ ماڭىزىنا توقتالدى.

«نۇرسۇلتان ءابىش ۇلى، مەن بىلايشا ەسەپتەپ كوردىم. مۇنايدىڭ باررەلى 60 دوللار تۇرادى. ال بالدىڭ باررەلى - 700 دوللار. ومارتا شارۋاشىلىعى نارىعىندا داعدارىس دەگەن بولمايدى. مۇمكىن قازاقستاندا مۇنايمەن قاتار، بالعا دا باسىمدىق بەرەرمىز»، - دەگەن دوبروۆولسكيي ءازىل- شىندى اڭگىمەسىمەن جۇرتتى كۇلكىگە قارىق قىلدى.

ءسوز سوڭىندا كاسىپكەر الداعى جوسپارىمەن ءبولىستى.

«الداعى جىلى اقمولا وبلىسىندا 400 گەكتار اۋماقتا بال ءوندىرىسى بويىنشا كونۆەيەردى ىسكە قوسامىن. الايدا مەنىڭ جەكە جوسپارلارىم دا بار. ءسىزدى بالمەن شاي ىشۋگە شاقىرامىن»، - دەدى ول.

ءوز كەزەگىندە، مەملەكەت باسشىسى ومارتاشىلىقتىڭ ماڭىزدى ەكەنىن ايتا كەلە، ارانىڭ تابيعاتقا زور پايداسىن تيگىزەتىنىن اتاپ ءوتتى.

«جارايسىڭ! سەنىڭ قالانى تاستاپ كەتىپ، تابيعاتقا تارتىپ كەتكەنىڭ - ۇلكەن ءىس»، - دەدى ەلباسى.

ەلباسىمەن كەزدەسۋ بارىسىندا قازاق- بريتان تەحنيكالىق ۋنيۆەرسيتەتىنىڭ عىلىمي قىزمەتكەرى حاديچا حاڭىرات 5 تىلدە سويلەپ، 3 تىلدە ساباق بەرەتىنىن ايتا كەلە، اتا- اناسىنىڭ عىلىم جولىنا تۇسۋىنە كەدەرگى بولعانىن اتاپ ءوتتى.

 «ءسىزدىڭ اتا- اناڭىزعا دا رۋحاني جاڭعىرۋ كەرەك. كوردىڭ بە؟ قازىر زامان تالابى وزگەردى. ول اتا- انانىڭ كىناسى ەمەس. ولاردى زامان سولاي تاربيەلەدى عوي. ءبىزدىڭ ورتاڭعى جانە ودان ۇلكەن ۇرپاق ءبارى سولاي تاربيەلەندى. ول مىنەزىمىزدى دە وزگەرتۋىمىز كەرەك»، - دەدى ەلباسى.

 ەسكە سالايىق، بۇگىن نۇرسۇلتان نازاربايەۆ «قازاقستاننىڭ 100 جاڭا ەسىمى» جوباسىندا جەڭىسكە جەتكەن 102 تۇلعامەن كەزدەسۋ وتكىزدى. مەملەكەت باسشىسىنىڭ جالپىحالىقتىق داۋىس بەرۋ ارقىلى انىقتالعان جەڭىمپازدارمەن كەزدەسۋى ەلورداداعى ەڭ كورىكتى مەيرامحانالاردىڭ بىرىندە ءوتتى. قازاقستاننىڭ تۋىن بيىككە كوتەرگەن سپورتشىلار مەن اق حالاتتى دارىگەرلەر، مەتسەناتتىقپەن كوزگە تۇسكەن بەلدى كاسىپكەرلەر مەن عالىمدار، مادەنيەت پەن قوعامدىق سالادا ەل اۋزىندا جۇرگەن ازاماتتار ەلباسىنىڭ جىلى لەبىزىنە بولەندى.

اۆتور: ايان بەكەن ۇلى