الماتى وبلىسىندا اياق- كيىم تىگەتىن سەح اشىلدى
تالدىقورعان. قازاقپارات - الماتى وبلىسىنىڭ كەربۇلاق اۋدانىندا تۇڭعىش پرەزيدەنت كۇنىنە وراي اياق- كيىم تىگەتىن سەح اشىلدى. شاعىن كاسىپورىن مەملەكەتتىك باعدارلامانىڭ قولداۋىمەن جۇزەگە استى،
دەپ حابارلايدى قازاقپارات ءتىلشىسى.
ەكىنشى توپتاعى مۇگەدەك اسحات تالعاربايەۆ «بيزنەستىڭ جول كارتاسى - 2020» باعدارلاماسى ارقىلى 1,5 ميلليون تەڭگە گرانتقا يە بولعان. بۇل قاراجاتقا قاجەتتى قۇرال- جابدىقتار ساتىپ الىپ، كاسىبىن باستاپ كەتتى. سونىمەن قاتار ول ءوزى سياقتى مۇمكىندىگى شەكتەۋلى ءتورت ازاماتتى جۇمىسپەن قامتىدى. جوسپار بويىنشا، سەحتا ايىنا 40 جۇپ اياق- كيىم تىگىلەدى جانە بۇل زاتتار تازا بىلعارىدان جاسالىنادى. باعاسى دا قاراپايىم حالىق ءۇشىن قولجەتىمدى بولماق.
ايتا كەتۋ كەرەك، كاسىبىن جاڭادان باستاعان اسحات تالعاربايەۆ تۋا ءبىتتى سويلەۋ قابىلەتىنەن ايىرىلعان. ول ءوزى سياقتى ازاماتتاردى جۇمىسپەن قامتىپ وتىر. ولارعا ارنايى سۋردو اۋدارماشى قىزمەت كورسەتەدى.
كەربۇلاق اۋدانىندا شاعىن سەحپەن قاتار، سۋ جۇيەسى دە جاڭاردى. ەندى شۇبار اۋىلىنىڭ حالقى اۋىز سۋدان تارىقپايتىن بولادى. سونىمەن قاتار اۋداننىڭ ورتالىعىنداعى ءبىر كوشەگە جاڭا اتاۋ بەرىلدى. ەندى سارىوزەكتەگى جاڭا شاعىن اۋدان ابىلاي حاننىڭ شوبەرەسى تەزەك تورەنىڭ اتىمەن اتالادى.
اۆتور: سامال قابىشيەۆا
