كولىك جاسايمىز دەپ ءوزىمىزدى الداماي- اق قويايىقشى - قۇلىبايەۆ
«شىنى كەرەك، قازىر ەلىمىزگە كولىك بولشەكتەرى جەتكىزىلگەننەن كەيىن ءبىز ءوزىمىزدى الداي باستايمىز. ەلەكترەنەرگيانى، تەمىرجول شىعىندارىن، كوممۋنالدىق تولەمدەر مەن جۇمىسشىلاردىڭ جالاقىسىن سانايمىز دا، مىنە، مىناۋ ءبىزدىڭ لوكاليزاتسيامىز (قازاقستاندىق قامتۋ - اۆت. ) دەيمىز. پايىزدىق كورسەتكىشىن دە كورسەتىپ قويامىز. جوق، بۇل لوكاليزاتسيا ەمەس. ول ءۇشىن كولىك بولشەكتەرىن ءوزىمىز شىعارۋىمىز قاجەت»، - دەدى قۇلىبايەۆ بۇگىن پرەزيديۋمنىڭ كەڭەيتىلگەن وتىرىسىندا. وسى ورايدا ۇيىم جەتەكشىسى وزبەكستاننىڭ كولىك ءوندىرىسىن مىسالعا كەلتىردى. بۇگىندە ول جاقتا شىنى دا، پلاستماسس تا، قاجەتتى بولشەكتەر دە جاسالادى. ناعىز لوكاليزاتسيا وسى.
«بىزدە لوكاليزاتسيا ەمەس، كولىك قۇراستىرۋ عانا. سوعان قاراماي، ماشينا جاساۋ سالامىز ءوسىپ جاتىر دەپ، دەپ ءوزىمىزدى جۇباتىپ وتىرامىز»، - دەپ اتاپ كورسەتتى پرەزيديۋم باسشىسى.
بۇدان بولەك، پالاتا باسشىسى اۋىل شارۋاشىلىعى تەحنيكاسىنىڭ لوكاليزاتسياسىن ارتتىرۋ قاجەت دەپ سانايدى.
«قازىر ايماقتاردى ارالاعاندا ءاربىر اكىم كومباين شىعارامىن دەپ ماقتانادى. ءبىر جەرگە بارساڭ، ءبىر مودەلدى كورسەتەدى، ەكىنشى جەردە تاعى ءبىر مودەل، ءۇشىنشىسى دە ءوز مودەلىن شىعارادى. بازالىق ءبىر مودەلدى شىعارساق تا، جەتپەي مە؟ بىرەۋىن تاڭدايىق. سوسىن ونىڭ قوسىمشا بولشەكتەرىن شىعارايىق. قىزمەت كورسەتۋ ورتالىقتارىن اشايىق»، - دەدى تيمۋر اسقار ۇلى.
