استانادا اسكەري قۇرىلىمدار اراسىندا جەكپە- جەكتەن سايىس وتەدى
ءىرى سپورتتىق شارا ق ر پرەزيدەنتى كۇنىنە وراي «داۋلەت» سپورت كەشەنىندە ەرلەر اراسىندا ۇيىمداستىرىلادى. جارىسقا رەسپۋبليكانىڭ ءار وڭىرىنەن، قۋاتتى قۇرىلىمداردان جاساقتالعان 55, 60, 65, 70, 75, 80, 85, 90 جانە 90 كەلىدەن جوعارى 9 ءتۇرلى سالماق دارەجەسى بويىنشا 26 كوماندا سىنعا تۇسپەك.
«اتالعان تۋرنير وتاندىق سپورتشىلاردىڭ جانە ەلىمىزدىڭ قۋاتتى قۇرىلىمدارىنىڭ قىزمەتكەرلەرى مەن اسكەري قىزمەتشىلەرىنىڭ كاسىبي بىلىكتىلىگىن ارتتىرۋعا باعىتتالعان.
سونداي-اق، سپورت سۇيەر قاۋىم ءۇشىن تۋرنير بارىسىندا باعالى سىيلىقتار مەن لوتەرەيا ويناتىلادى. كورەرمەن نازارىنا ق ر م ك ق پرەزيدەنتتىك وركەسترىنىڭ كونسەرتتىك باعدارلاماسى مەن ق ر مەملەكەتتىك كۇزەت قىزمەتى قىزمەتكەرلەرىنىڭ جەكپە-جەك سايىسىنان قويىلىمدىق كورسەتىلىمدەر ۇسىنىلادى»، - دەيدى ءتۋرنيردى ۇيىمداستىرۋشىلار.
اتالعان ءدۇبىرلى دودانىڭ وتۋىنە جەكپە-جەك سايىسىنان بۇكىل قازاقستاندىق قاۋىمداستىق پەن ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ كوميتەتى ۇيىتقى بولىپ وتىر.
جارىستىڭ سالتاناتتى اشىلۋ ءراسىمىن 28- قاراشا كۇنى ساعات 15:00 دە وتكىزۋ جوسپارلانعان. 29- قاراشا كۇنى ساعات 18:00 دە تۋرنير قورىتىندىسى بويىنشا ۇزدىكتەر انىقتالىپ، جەڭىمپازداردى ماراپاتتاۋ ءراسىمى وتەدى.
