الداعى مەرەكە كۇندەرى كوكشەتاۋلىقتاردى توسىن سىي كۇتىپ تۇر - قالا اكىمى

مەرەكە قارساڭىندا كوكشەتاۋ قالاسىندا بىرنەشە تۇرعىن ءۇي مەن قوعامدىق الاڭداردى پايدالانۋعا بەرۋ جوسپارلانعان.

سونداي-اق، جاڭا جىل مەيرامىنىڭ دا جاڭالىقتارى كوپ بولماق، دەپ حابارلايدى قازاقپارات ءتىلشىسى اكىمدىكتىڭ باسپا ءسوز قىزمەتىنە سىلتەمە جاساپ.

باسپا ءسوز قىزمەتىنىڭ مالىمەتى بويىنشا، جەلتوقسان ايىندا بولاتىن ماڭىزدى مەملەكەتتىك مەرەكە كۇندەرىن ۇيىمشىلدىقپەن وتكىزۋگە قاتىستى قالا اكىمى ەرمەك مارجىقپايەۆ ۆەدومستۆولار مەن سالا باسشىلارىن جيناپ، كەڭەس وتكىزدى.

قالالىق مادەنيەت ءبولىمى جاۋاپتى سانالاتىن شىعارماشىلىق شارالارمەن قاتار الەۋمەتتىك ماسەلە دە نازارعا الىنۋى تيىس دەلىندى. ايدىڭ بىرىنشى جارتىسىندا جاڭا نىساندار پايدالانۋعا بەرىلەدى. ونىڭ قاتارىندا مەملەكەتتىك جانە كوممەرتسيالىق باعىتتاعى بىرنەشە كوپقاباتتى ۇيلەر، نەكە قيۋ سارايى، تەمىرجولشىلار اللەياسى جانە جاستار سكۆەرى بار.

قالا اكىمى اتاۋلى كۇندەر جاقىنداپ كەلە جاتقانىن جانە وعان مۇقيات قاراۋ قاجەتتىگىن ايتتى. كوكشەتاۋدى جاڭا جىل مەرەكەسىنە وراي بەزەندىرۋ جۇمىستارى جاقىندا قولعا الىنادى. بيىل گوركيي كوشەسىنىڭ جارىقشامدارى جاڭارتىلىپ، بارلىق اركالار، سۋبۇرقاقتار، پانەل-كرونشتەيندەر ارلەنەدى. بىرنەشە اۋماققا شىرشا قويىلىپ، مۇز قالاشىعى سالىنادى. شاھار باسشىسى بۇل جۇمىستاردان كراسنىي يار مەن ستانتسيوننىي ەلدى مەكەندەرى دە قالىس قالماۋى تيىس دەپ وتىر.