جىرشى ۇلجان بايبوسىنوۆاعا فرانسيانىڭ وردەنى تابىس ەتىلدى - فوتو

الماتى. قازاقپارات - فرانسيانىڭ قازاقستانداعى توتەنشە جانە وكىلەتتى ەلشىسى فيليپپ مارتينە تانىمال قازاق جىرشىسى ۇلجان بايبوسىنوۆاعا «فرانسيا ادەبيەتى مەن ونەرىنىڭ كاۆالەرى» وردەنىن سالتاناتتى تۇردە تابىس ەتتى، دەپ حابارلايدى قازاقپارات ءتىلشىسى.

فرانسيا ەلشىسى وردەندى الماتىدا وتكەن «ۇلى دالا ەلى» ەتنوفەستيۆالىندە سالتاناتتى تۇردە تاپسىردى. ول فرانسيا مادەنيەت ءمينيسترىنىڭ ارنايى تاپسىرماسىمەن ەۋروپادان جولدانعان قۇرمەتكە قازاق جىرشىسى لايىق ەكەنىن ايتتى.

«ۇلى دالا ەلى» ەتنوفەستيۆالى تاماشا جوبا. بۇگىنگى كەشتە ماعان قازاقستاننىڭ وڭتۇستىك وڭىرىنەن كەلگەن جىرشىلار مەن قاراقالپاستاننان كەلگەن ونەرپازدىڭ ورىنداۋىنداعى جىرلار قاتتى ۇنادى. ولاردىڭ داۋىسى مەن مۋزىكالىق اسپاپتا ورىنداۋى شەبەر شىقتى. مەن بۇگىنگى كەشكە استانادان ۇلجان بايبوسىنوۆا ءۇشىن كەلدىم. ول فرانتسيامەن، قازاقستانداعى ءبىزدىڭ ەلشىلىكپەن بىرگە بۇرىننان جۇمىس ىستەپ كەلە جاتىر. ونىڭ ەڭبەگى زور. فرانسيادا ورتالىق ازيا مۋزىكاسىن ءسۇيىپ تىڭدايتىندار كوپ. ونىڭ ىشىندە قازاق ءانى تىڭدارماندارىنىڭ كلۋبى بار»، - دەدى فرانسيا ەلشىسى قازاقپارات تىلشىسىنە بەرگەن سۇحباتىندا.

ۇلجان بايبوسىنوۆا «ۇلى دالا ەلى» جوباسى جاۋاپكەرشىلىگى زور جوبا ەكەنىن جەتكىزدى.

«جىرشىلىق، جىراۋلىق ونەردىڭ قانشالىقتى تەرەڭ ەكەنى بەلگىلى. سول سەبەپتى بۇعان ۇلكەن جاۋاپكەرشىلىكپەن قاراۋعا تۋرا كەلەدى. تەرەڭ ماعىنالى مۇرانى باعاسىن تۇسىرمەي حالىققا جەتكىزۋ باستى مۇراتىمىز بولدى. بارلىق قازاققا ورتاق ونەر بولعاندىقتان بۇگىنگى كۇنگى ورىنداۋشىلارى مەن ءىزىن جالعاستىرۋشى ۇرپاقتارىن قامتۋ قاجەت»، - دەدى ۇلجان بايبوسىنوۆا.

ايتا كەتەيىك، الماتىداعى م. اۋەزوۆ اتىنداعى مەملەكەتتىك اكادەميالىق دراما تەاترىندا «ۇلى دالا ەلى» اتتى حالىقارالىق جىرشىلار فەستيۆالى بولدى. جىر كەشى «رۋحاني جاڭعىرۋ» باعدارلاماسى اياسىندا الماتى قالالىق اكىمدىگىنىڭ ۇيىمداستىرۋىمەن وتكىزىلدى. كەشكە جىر تىڭداۋعا الماتى اكىمى باۋىرجان بايبەك پەن ونەر سۇيەر قاۋىم، ستۋدەنتتەر جينالدى. جىر كەشىندە كورەرمەن تەك قازاقستاندىق ونەرپازداردىڭ عانا ەمەس، الىس-جاقىن تۇركى حالىقتارى جىرشىلارىنىڭ دا ونەرىن تاماشالادى. ناقتىراق ايتقاندا، سىر، ورال، ماڭعىستاۋ ءوڭىرىنىڭ جىراۋلىق ونەرىنىڭ حاس شەبەرلەرى، بۇگىنگى قازاق جىرشىلارىنىڭ اقساقالدارى حاتيموللا بەردىعالييەۆ، بيداس رۇستەمبەكوۆ، وسەرباي سارسەنبايەۆ باستاعان جىرشى-تەرمەشىلەرىمىزبەن قاتار، وزبەكستان، تۇرىكمەن، قاراقالپاق ەلدەرىنەن كەلگەن جىرشىلار دا ونەر كورسەتتى.

اۆتور: الماس مۇقاش ۇلى