بوكس: قازاقتىڭ ءۇش قىزى الەم چەمپيوناتىنىڭ فينالىندا

استانا. قازاقپارات - ءۇندىستاننىڭ گۋۆاحاتي قالاسىندا ءوتىپ جاتقان بوكستان جاس ءوسپىرىم قىزدار اراسىنداعى الەم چەمپيوناتىندا قازاقتىڭ ءۇش قىزى فينالعا شىقتى، دەپ حابارلايدى قازاقپارات.

وسىعان دەيىن 48 كەلى سالماقتا جازيرا وراقبايەۆا مەن 81+ كەلى سالماقتا دينا يسلامبەكوۆا فينالعا شىقسا، 81 كەلىگە دەيىنگى سالماقتا تاعى ءبىر وتانداسىمىز ارايلىم بەكدىلدا دا قارسىلاسىن جارىس جولىنان تايدىرىپ، جەڭىس تۇعىرىنىڭ ەڭ بيىك ساتىسىنا ءبىر تابان جاقىنداي ءتۇستى.

ارايلىم بەكدىلدا جارتىلاي فينالدا ۋكرايندىق بوكسشى ەليزاۆەتا سليۋساردى 30-27, 30-27, 30-27,30-26,30-26 ەسەبىمەن قاپى قالدىردى.

ەستەرىڭىزگە سالا كەتەيىك، ازىرگە قازاقستان قورجىنىندا ەكى قولا مەدال بار. ونىڭ ءبىرىنشىسىن 51 كەلى سالماقتا ەل نامىسىن قورعاعان جانسايا ابدرايموۆا جەڭىپ السا، ەكىنشىسىن 60 كەلى سالماقتا سىنعا تۇسكەن جانسايا بالتابەكوۆا يەلەندى.  

اۆتور: كۇنسۇلتان وتارباي