شىمكەنتتە ءبىر وتباسى مۇشەلەرىنىڭ ءولى دەنەلەرى تابىلدى

قايعىلى جاعداي قالانىڭ ىرگەسىندەگى تاسكەن ەلدى مەكەنىندە بولدى، دەپ حابارلايدى قازاقپارات ءتىلشىسى.

وبلىستىق ءى ءى د باسپا ءسوز قىزمەتىنىڭ جەتەكشىسى سالتانات قاراكوزوۆانىڭ ايتۋىنشا، جانۇيا مۇشەلەرىنىڭ، ياعني وتاعاسى، ونىڭ جۇبايى مەن بەس جاسار بالاسىنىڭ باقيلىق بولعانىن الدىمەن كورشىلەرى بىلگەن.

الايدا ىشكە كىرۋگە قورقىپ، تۋعان-تۋىستارىنا حابارلاعان. ارتىنشا پوليتسيا شاقىرتقان.

«پوليتسەيلەر وقيعا ورنىنا جەتكەندە ۇيدەن ءۇش ءمايىت تابىلدى. ولار 1976 جانە 1983-جىلى تۋعان ەرلى-زايىپتىلار مەن 2012-جىلى تۋعان ۇل بالالارىنىڭ دەنەسى ەكەنى انىقتالدى.

تەكسەرۋ بارىسىندا ەسىكتەرىنىڭ بۇزىلماعانى، ەشبىر زاتتارىنىڭ جوعالماعانى بەلگىلى بولدى. دەنەلەرىنەن دە زورلىق-زومبىلىق بەلگىلەرى بايقالمادى. الدىن الا بولجام بويىنشا، ۇيدەگى جىلىتۋ پەشىنەن يىستەنۋى مۇمكىن دەگەن بولجام بار. قازىرگى تاڭدا ءبىر ۇيدەن ءۇش ءمايىتتىڭ تابىلۋ فاكتىسى قاراتاۋ اۋداندىق پوليتسيا بولىمىندە سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە تىركەلدى. سوت-مەديتسينالىق ساراپتاما تاعايىندالدى. سونىڭ قورىتىندىسى بويىنشا ولىمدەرىنىڭ سەبەبى بەلگىلى بولادى»، - دەيدى سالتانات قاراكوزوۆا.

ال توتەنشە جاعدايلار دەپارتامەنتىنىڭ باستىعى نۇربولات دەربىسوۆ مارقۇمدار كومىرقىشقىل گازىنان ۋلانباعان بولۋى مۇمكىن دەپ وتىر.

سەبەبى وقيعا ورنىنا كەلگەن گازعا جاۋاپتى ماماندار بولمەلەردى ارنايى قۇرىلعىمەن تەكسەرىپ، ولاردا ىستى گازدىڭ بولعانىن راستاماعان. سوندىقتان قايعىلى وقيعا توتەنشە جاعداي سالدارىنان ورىن العاندىعى رەتىندە تىركەۋگە الىنباعان.

قالاي بولعاندا دا قۇزىرلى ورگان وكىلدەرى جانۇيا مۇشەلەرىنىڭ قانداي جاعدايدا اجال قۇشقانىن ءتيىستى ساراپتامادان سوڭ بەلگىلى بولاتىنىن ايتادى.