قىرعىزستان پرەزيدەنتى پۋتين مەن ميرزيايەۆتى ماراپاتتادى
استانا. قازاقپارات - قىرعىزستان پرەزيدەنتى المازبەك اتامبايەۆ رەسەي پرەزيدەنتى ۆلاديمير پۋتيندى «ەكى ەل اراسىنداعى وداقتاستىقتى دامىتۋ جانە ستراتەگيالىق ارىپتەستىكتى نىعايتۋعا قوسقان ەرەكشە ۇلەسى ءۇشىن» 1- دارەجەلى «ماناس» وردەنىمەن ماراپاتتاۋ تۋرالى جارلىق شىعاردى.
بۇل تۋرالى قىرعىزستان پرەزيدەنتىنىڭ باسپا ءسوز قىزمەتى حابارلادى.
اتامبايەۆ بۇعان قوسا وزبەكستان پرەزيدەنتى شاۆكات ميرزيايەۆتى «ەجەلگى دوستىق پەن كورشىلەر تاتۋلىعىن نىعايتۋداعى جانە ستراتەگيالىق ارىپتەستىك ورناتۋداعى ەرەن ەڭبەگى ءۇشىن» «دانەكەر» وردەنىمەن ماراپاتتاۋ تۋرالى جارلىق شىعارعان.
سونىمەن قاتار سوۆەت زامانىندا قۇرىلعان وزبەكستاندىق «ياللا» ءانسامبلىنىڭ جەتەكشىسى فاررۋح زاكيروۆ «دوستۋك» وردەنىمەن ماراپاتتالعان.
اتامبايەۆ وسى ايدىڭ سوڭىندا پرەزيدەنت قىزمەتىنەن كەتەدى. 24 - قاراشادا قىرعىزستاننىڭ جاڭا سايلانعان پرەزيدەنتى، اتامبايەۆتىڭ سەرىگى سانالاتىن سوورونباي جەيەنبەكوۆتى ۇلىقتاۋ سالتاناتى وتەدى.
