استانادا ۇزدىك قازاقءتىلدى سايتتار ماراپاتتالدى - فوتو

 ينتەرنەت جۇيەسىندەگى ۇزدىك قازاقءتىلدى رەسۋرستاردى انىقتاپ، ولارعا قولداۋ ءبىلدىرۋدى كوزدەيتىن «ق ر تۇڭعىش پرەزيدەنتى - ەلباسى قورى مەن مەملەكەتتىك ءتىلدى دامىتۋ قورىنىڭ ۇزدىك قازاقءتىلدى ينتەرنەت- سايت سىيلىعى» بايقاۋى بيىل ەكىنشى رەت ۇيىمداستىرىلىپ وتىر. بايقاۋعا ينتەرنەتتەگى تاجىريبەسى كەمىندە ءبىر جىلدى قۇرايتىن، قازاق تىلىندە اقپارات تاراتاتىن ۇكىمەتتىك ەمەس، تاۋەلسىز قوعامدىق سايتتار قاتىسا الادى جانە بيىل رەسپۋبليكانىڭ ءتۇرلى ايماقتارىنان 33 ءوتىنىم كەلىپ تۇسكەن.

قازىلار القاسى سايتتاردى مازمۇنى، قىزمەت باعىتى، ينتەراكتيۆتىلىگى، قازاق ءتىلى مەن ۇلتتىق قۇندىلىقتاردىڭ دارىپتەلۋى، پاتريوتتىق تاقىرىپتاردىڭ ۇزدىكسىز كوتەرىلۋى، كوركەمدىك جاعى، يدەيا ەرەكشەلىگى سىندى تالاپتار بويىنشا سارالاعان. وسىلايشا، بايقاۋدىڭ «وتكىر ءتىل» - مەملەكەتتىك ءتىل مەن ۇلتتىق قۇندىلىقتاردى ناسيحاتتاۋشى ۇزدىك سايت رەتىندە «www.zheruiyq.kz» سايتى جەڭىمپاز دەپ تانىلدى.

ق ر تۇڭعىش پرەزيدەنتى - ەلباسى قورىنىڭ اتقارۋشى ديرەكتورىنىڭ ورىنباسارى سۇلتان ايتجانوۆ جەڭىمپاز سايت رەداكتورىنا ديپلوم مەن 385 مىڭ تەڭگەلىك سەرتيفيكاتتى تابىس ەتتى جانە جەكەلەگەن باعىتتار بويىنشا ءالى دە قازاقءتىلدى سايتتاردىڭ جەتىسپەۋشىلىگى بايقالاتىنىن باسا ايتتى.

 «بيىل جۇلدەمىزدىڭ سانى كوبەيدى، قاتىسۋشىلاردىڭ سانى ارتتى. وسى ورايدا، ءبىز نازار اۋداراتىن ەكى ماسەلە بار: بيىل ەكى جۇلدەنى - «بالالارعا ارنالعان ۇزدىك مەملەكەتتىك ەمەس قازاقءتىلدى سايت» جانە «ايماقتىق ۇزدىك مەملەكەتتىك ەمەس قازاقءتىلدى سايت» اتالىمدارىن نازارسىز قالدىرىپ وتىرمىز. سەبەبى قازاقستاندا ءدال وسى نوميناتسيالارعا ساي كەلەتىن قازاقءتىلدى رەسۋرس جوق. بۇل ماسەلە بارشامىزدى ويلاندىرۋى ءتيىس» ، - دەيدى سۇلتان ايتجانوۆ.

 بايقاۋدىڭ «رۋحاني ازىق» اتالىمى بويىنشا «Qamshy.kz»  سايتى ۇزدىك دەپ اتالدى. جۇلدەنى ق ر پارلامەنتى ءماجىلىسىنىڭ دەپۋتاتى باقىتبەك سماعۇل تابىستادى جانە قازاق جاستارىنا ارنالعان جۇرەكجاردى ولەڭىن وقىپ بەردى.

«تەرەڭ ىزدەنىس» نوميناتسياسىنىڭ جۇلدەسىن «247media.kz» سايتى جەڭىپ الدى. «247media.kz» ادەبيەت، تاريح، الەم جاڭالىقتارى جونىندە ماتەريال جاريالايتىن قازاقتىلدى رەسۋرستاردىڭ ءبىرى. «شىنايى ءومىر» اتالىمى بويىنشا «kerekinfo.kz» پورتالى ۇزدىكتەردىڭ قاتارىنان تابىلدى. كەزەكتى ماراپاتتى تابىس ەتكەن «قازاقپارات» ح ا ا باس ديرەكتورىنىڭ كەڭەسشىسى ماحات سادىق زاماننىڭ كوز ىلەسپەس جىلدامدىقپەن وزگەرىپ جاتقانىن اتاپ ءوتتى جانە جەڭىمپاز سايت يەلەرىنە روبوتتىڭ ءوزى الماستىرا المايتىن ينتەللەكتۋال بولۋعا كەڭەس بەردى.

 «سپورت تىنىسى» اتالىمى بويىنشا ەكى رەسۋرس قاتارىنان جەڭىمپاز اتاندى. ناتيجەسىندە ۇلتتىق سپورتتى ناسيحاتتايتىن ulttyqsport.kz جانە قازاق تىلىندە سپورت جاڭالىقتارىن تاراتاتىن alzhan.kz سايتتارى ماراپاتتالدى. «ءبىلىم بۇلاعى» اتالىمى بويىنشا دا kaz-tili.kz جانە qaztest.kz سايتتارى جەڭىسكە جەتتى.

 ءبىر ايتا كەتەرلىگى، جەڭىمپاز اتانعان kaz-tili.kz سايتىن باعدارلاماشى تاتيانا ۆاليايەۆا 10 جىل بۇرىن اشقان جانە بۇگىنگە دەيىن وزگە ۇلت وكىلدەرىنە قازاق ءتىلىن ۇيرەتىپ كەلگەن.

«جاستار الەمى» اتالىمى بويىشا zhasatyrau.kz جانە «ويىن- ساۋىق» اتالىمى بويىنشا - baribar.kz سايتتارى ماراپاتتالدى.

ايتا كەتەيىك، ق ر تۇڭعىش پرەزيدەنتى - ەلباسى قورى مەن مەملەكەتتىك ءتىلدى دامىتۋ قورى قازاق ءتىلىن ناسيحاتتاۋعا قاتىستى ءبىرقاتار بىرلەسكەن جوبالاردى جۇزەگە اسىرىپ كەلەدى. اتاپ ايتقاندا، 2016 -جىلدىڭ قىركۇيەك ايىندا Soyle.kz ادىستەمەسى بويىنشا قازاق ءتىلىن Skype ارقىلى وقىتۋ جوباسىن باستالسا، بيىل «Qazaqstan3D» ۆەب- سايتى مەن موبيلدى قوسىمشاسىن جانە «جەتى قازىنا» ەنسيكلوپەديالىق قوسىمشاسى تانىستىرىلدى.

 اۆتور: ايجان سەرىكجان قىزى