حابار ارناسىنىڭ تاپسىرىسىمەن تاعى ءبىر وتاندىق تەلەحيكايا ءتۇسىرىلىپ جاتىر

استانا. قازاقپارات - «حابار» ارناسىنىڭ تاپسىرىسىمەن ءتۇسىرىلىپ جاتقان تاعى ءبىر وتاندىق تەلەحيكايا كەلەر جىلدىڭ كوكتەمىندە جارىققا شىعادى. شىنايى وقيعاعا قۇرىلعان تۋىندىنىڭ رەجيسسەرى -  سەرىكبول وتەپبەرگەن.

كۇزدىڭ قارا سۋىعىنا قاراماستان، ءتۇسىرۋ جۇمىستارى قىزۋ ءجۇرىپ جاتىر. ەكشن جانرىنداعى 5 سەريادان تۇراتىن تەلەحيكايا سسەناريى بولعان وقيعا ىزىمەن جازىلعان. ياعني 2010 -جىلى اقتاۋ تۇرمەسىنەن قاشقان 21 ادامنىڭ قانقۇيلى وقيعاسى سۋرەتتەلەدى.

 «بۇل جوبانى تۇسىرۋدەگى باستى ماقساتىمىز -  ۇلتتىق ۇلاننىڭ شىنايى بەت- بەينەسىن كورسەتۋ، ولاردىڭ قانداي ەرلىك جاساۋعا دايىن ەكەندىكتەرىن پاش ەتىپ، جاستاردى اسكەري بورىشىن ابرويمەن وتەۋگە شاقىرۋ»، -  دەيدى فيلمنىڭ باس رەجيسسەرى سەرىكبول وتەپبەرگەن.

قازان ايىندا باستالعان ءتۇسىرۋ جۇمىستارى جەلتوقساندا اياقتالىپ، كەلەر جىلدىڭ كوكتەمىندە «حابار» ارناسىنان كورسەتىلە باستايدى. «شىتىرمان وقيعاعا نەگىزدەلگەن فيلمنىڭ ناقتى قالاي اتالاتىنىن قايتا ويلاستىرامىز»، -  دەيدى جوبا اۆتورلارى.

www.24.kz