بيىل اۋعانستاندا ەسىرتكى رەكوردتىق دەڭگەيدە وندىرىلگەن
استانا. قازاقپارات - 2017-جىلى اۋعانستاندا اپيىندى كوكنار ءوندىرىسى رەكوردتىق دەڭگەيگە جەتكەن، دەپ حابارلايدى انادولى.
اۋعانستاننىڭ ەسىرتكىمەن كۇرەس ءمينيسترىنىڭ ورىنباسارى احماد دجاۆيد كايم اگەنتتىككە بەرگەن سۇحباتىندا ناشانىڭ اۋعانستانعا عانا ەمەس كۇللى الەمگە قاۋىپ ءتوندىرىپ وتىرعاندىعىن ايتىپ بەردى.
«اۋعانستاندا اپيىندى كوكنار ءوندىرىسىنىڭ وسۋىنە الەم بويىنشا ونى تۇتىنۋ سۇرانىسىنىڭ ءوسۋى، قارجىلىق جانە تەحنيكالىق قولداۋدىڭ جەتىسپەۋى، جاۋاپتى تۇلعالار جۇمىستارىنىڭ ناشار ۇيىمداستىرىلۋى، ناركومافيانىڭ وپپوزيتسيالىق توپتارمەن ىمىرالاسۋ فاكتورلارى سەبەپ بولىپ وتىر»، - دەدى كايم.
مينيستر ورىنباسارىنىڭ سوزىنە قاراعاندا، 2017-جىلى ەلدەگى اپيىندى كوكنار ءوندىرىسى رەكوردتىق كورسەتكىشكە جەتكەن.
«ەسىرتكىمەن كۇرەستە بارلىق ەلدەر تىزە قوسىپ كۇرەسۋ قاجەت، ايتپەسە ناركوتەرروريزم كۇللى الەمگە قاۋىپ تۋدىرماق»، - دەپ اتاپ ءوتتى اۋعان وكىلى.
