وڭتۇستىكتىڭ كەلىندەرى سالەم سالىپ جارىستى

جاستار ءۇشىن تاعىلىمى مول ونەر سايىسىنا اۋىل- ايماقتان 11 كەلىن قاتىسىپ، باعىن سىنادى، دەپ حابارلايدى قازاقپارات ءتىلشىسى.

سوزاق اۋداندىق ايەلدەر كەڭەسىنىڭ ۇيىمداستىرۋىمەن وتكەن بايقاۋدىڭ تالاپتارى وڭاي بولا قويعان جوق. قايىن سىڭلىلەرىمەن بىرگە كەلگەن اۋىلدىڭ كەلىندەرى بارىن سالىپ، ونەر كورسەتتى. بايقاۋدا تالاپكەرلەر قازاقتىڭ ۇمىت بولا باستاعان ۇلتتىق تاعام تۇرلەرىن دايىندادى. قول ونەرى مەن ىسمەرلىگىن كورسەتتى. سونىمەن بىرگە شىعارماشىلىق ءبىلىمىن تانىتۋ بويىنشا سىنعا ءتۇستى. بارىنەن دە اتا- ەنەسىنە سالەم سالۋ، قايىن سىڭلىلەرىنە ات قويۋ سەكىلدى تالاپتار قيىنعا سوقتى. حالقىمىزدىڭ سالت- جورالعىلارىنا ساي كەلەتىن ءداستۇردى كەلىندەر بارىنشا كورسەتۋگە تىرىستى.

سونداي-اق سايىستا قۇراق كورپە جاساۋ، ۇرشىق ءيىرۋ سىندى ۇلتتىق قولونەرىمىز دارىپتەلدى. وتە تارتىستى وتكەن سايىستا اۋىل كەلىندەرى قازاق انالارىنا ءتان يبالىلىق پەن ادەپتىلىكتى، ىسمەرلىك پەن ەپتىلىكتى جوعارى دارەجەدە كورسەتىپ، كوپشىلىكتىڭ ريزاشىلىعىنا بولەندى.

ءىس- شارا سوڭىندا بايقاۋعا قاتىسقان بارلىق ۇمىتكەر العىس حاتپەن ماراپاتتالدى. قازىلار القاسىنىڭ شەشىمى بويىنشا باس جۇلدەگە شولاققورعان اۋىلىنداعى «ايشۋاق» بالالار باقشاسىنىڭ تاربيەشىسى اقبوتا رومانقۇلوۆا يە بولدى.