قازاق وقۋشىلاردىڭ روبوتى بۇكىلالەمدىك وليمپيادادا ۇزدىك اتاندى
وندا راتمير سارتبايەۆ پەن انەل كارىمعالي جاساعان ءورت ءسوندىرۋشى روبوت شىعارماشىلىق ساناتتاعى ۇزدىك جوبالاردىڭ ءبىرى اتاندى.
بۇل تۋرالى زاماناۋي ءبىلىم بەرۋ مەن تاربيە ۇردىستەرى تالقىلاناتىن قازاقستانداعى تۇڭعىش پلاتفورما NOVACITY. KZ سايتىندا جاريالاندى.
World Robot Olympiad - روبوتوتەحنيكا بويىنشا10-21 جاس ارالىعىنداعى جاستار مەن وقۋشىلارعا ارنالعان باستى حالىقارالىق بايقاۋ. وليمپيادا 2004 -جىلدان بەرى وتكىزىلىپ كەلەدى.
بيىل الەمنىڭ 53 ەلىنەن كەلگەن 400 گە جۋىق كوماندا كوستا- ريكا استاناسى سان- حوسەدە باس قوستى. ولار «روبوتتار فۋتبولى»، «ستۋدەنتتىك»، «شىعارماشىلىق» جانە «نەگىزگى» ساناتتاردا باق سىنادى.
شىعارماشىلىق ساناتتا فيزيكا- ماتەماتيكا باعىتىنداعى نازاربايەۆ زياتكەرلىك مەكتەبىنىڭ وقۋشىلارى - تالدىقورعاندىق راتمير سارتبايەۆ پەن الماتىلىق انەل كارىمعالي ۇزدىك ناتيجە كورسەتتى. ولار جاساعان ورمان ورتتەرىن ەسكەرتۋگە جانە وشىرۋگە ارنالعان روبوتتار پروتوتيپى ەرەسەك توپتاعى 31 كوماندا اراسىندا ءتورتىنشى ورىن الدى.
اتالعان جوبادا ەكى روبوت بار. ءبىرىنشى كۆادروكوپتەر ورمان ۇستىنەن ۇشىپ ءجۇرىپ، ءورتتى انىقتايدى جانە ەكىنشى روبوتقا حابار بەرەدى. ەكىنشى روبوت ءورت بولعان اۋماقتى جانە ءورتتىڭ ءورشۋىن انىقتايتىن ارنايى جۇيەلەر ارقىلى وتتى سوندىرەدى.
سۋ ءبىتىپ قالعان جاعدايدا روبوت GPS- قۇرىلعى ارقىلى جاقىن ورنالاسقان سۋ قويماسىنا بارىپ، قاجەتتى سۋ جيناپ قايتادى. سونداي-اق، كۆادروكوپتەر ءدارى قورابى مەن وزگە دە قاجەتتىلىك زاتتارىن جەتكىزە الادى.
قازاقستاندىق بالالاردىڭ بۇل جاڭالىعى كوپتەگەن ەلدەر ءۇشىن پايدالى بولماق. اسىرەسە قازاقستاندا جىل سايىن 4 مىڭعا جۋىق ورمان ورتتەرى ورىن الادى، شامامەن 100 گەكتار جەر ورتەنەدى. مۇنداي ورتتەردىڭ الدىن الۋعا ارنالعان ءتيىمدى شەشىمدەر ءالى تابىلماعان.
ايتا كەتەيىك، تسيفرلىق الەمنىڭ عالامدىق پروبلەمالارىن شەشۋدى جانە مەكتەپ وقۋشىلارىنىڭ ويلاۋ جاسامپازدىعىن قالىپتاستىرۋدى ماقسات تۇتقان «World Robot Olympiad» - الەمدىك روبوتتار وليمپياداسى 2004 -جىلدان بەرى وتكىزىلىپ كەلەدى. بۇگىندە WRO كلۋبىنا 50-دەن استام مەملەكەت، 20 مىڭنان استام وقۋشى مۇشەلىككە ەنىپ ۇلگەردى. «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمى 2014 -جىلدان بەرى الەمدىك روبوتتار وليمپياداسىنىڭ قازاقستانداعى روبوتوتەحنيكادان ۇلتتىق ۇيلەستىرۋشىسى بولىپ تابىلادى.
