كاتونقارايدا «جوعالعان» قار بارىسى تابىلدى
وسكەمەن. قازاقپارات - كاتونقاراي ۇلتتىق پاركىندەگى فوتوتۇزاق قار بارىسىنىڭ ءىزىن ءتۇسىرىپ الدى، دەپ حابارلايدى «قازاقپارات» ح ا ا ءتىلشىسى.
ءتۇز تاعىسىنىڭ ءىزىن ق ر ب ع م مينيسترلىگى زوولوگيا ينستيتۋتى عىلىم كوميتەتىنىڭ قىزمەتكەرلەرى ءتۇسىرىپ العان. ينستيتۋت قىزمەتكەرلەرى اعا عىلىمي قىزمەتكەر رىسبەك بايداۋلەتتىڭ جەتەكشىلىگىمەن قورىقتى زەرتتەۋگە شىققان بولاتىن. بۇعان دەيىن حابارلانعانىنداي، كاتونقاراي ۇلتتىق پاركىندە بۇكىل الەمدىك جابايى تابيعات قورىنىڭ (WWF) ەكسپەديتسياسى زەرتتەۋ جۇرگىزىپ، ولار قۇرعان 19 فوتوتۇزاقتىڭ بىرىنە دە قار بارىسى ىلىكپەگەن بولاتىن. سول سەبەپتى وسى جىلدىڭ قاراشا ايىندا بىرلەسكەن ەكسپەديتسيانى قايتا قۇرۋ كوزدەلگەن ەدى. الايدا ۇلتتىق پاركتىڭ باس ديرەكتورى ەرلان ءمۇستافيننىڭ سوزىنە سەنسەك، «زەرتتەۋشىلەردىڭ ەڭبەگى اقتالعان» كورىنەدى. ورمان جانە اڭشىلىق شارۋاشىلىعىنىڭ جەدەل ارەكەت ەتۋ جاساعى باستىعىنىڭ ورىنباسارى ۆاسيلي تكاچەنكونىڭ ايتۋىنشا، اتالعان جاساق قازاقستاندىق زوولوگتاردىڭ كاتونقاراعاي قورىعىنا ەكسپەديتسياسىن ۇيىمداستىرۋ، اپارىپ، قايتا اكەلۋ جۇمىسىمەن اينالىسقان.
«مىنە، ولار قايتىپ كەلە جاتىر. ولاردا بارىستىڭ 4 ءتۇرى بويىنشا تىركەلگەن ماتەريالدارى بار. بارىستاردىڭ ەكەۋى جەكە، قالعان ەكەۋى - انالىعى مەن كۇشىگى بىرگە جورتىپ جۇرگەن. زەرتتەۋ جۇمىسى مۇنىمەن توقتاپ قالمايدى. فوتوتۇزاقتار كوكتەمگە دەيىن تۇرادى. الداعى ۋاقىتتا فوتوتۇزاقتارعا ءالى دە قىزىق ماتەريالدار ىلىنەدى دەگەن سەنىمدەمىن» ، - دەيدى ول.
كاتونقاراي ۇلتتىق پاركى - قىزىل كىتاپقا ەنگەن كوپتەگەن اڭدار مەن قۇستاردىڭ مەكەنى. وندا سيرەك ءارى قۇرىپ بارا جاتقان اڭداردى كوبەيتۋ باعىتىندا جۇمىس جۇرگىزىلەدى. ناقتىراق ايتقاندا، سۇتققورەكتىلەردىڭ ءتورت ءتۇرى بار. قار بارىسى، ارقار، اقتوس سۋسار سەكىلدى قۇرىپ بارا جاتقان اڭدار وسىندا مەكەن ەتەدى. سونىمەن بىرگە، سيرەك كەزدەسەتىن قۇستىڭ 20 ءتۇرىن كاتونقاراعاي ۇلتتىق پاركىنەن كەزدەستىرۋگە بولادى.
اۆتور: ايان بەكەن ۇلى
