ون بەس مىڭ عالىم ادامزاتقا ءتونىپ تۇرعان باستى قاتەرلەردى اتادى

  «ادامزاتقا ەكىنشى ەسكەرتۋ» دەپ اتالعان ۇندەۋ BioScience جۋرنالىنا شىققان. بۇل تۋرالى Baq.kz اقپارات اگەنتتىگى امەريكالىق The Washington Post باسىلىمىنا سىلتەمە جاساپ حابارلايدى.

پلانەتا ەكوجۇيەسىنە ءتونىپ تۇرعان ەڭ باستى قاۋىپ دەپ عالىمدار جاھاندىق جىلىنۋدى اتادى. 1992 -جىلدان بەرى ورتاشا جاھاندىق تەمپەراتۋرالار سەلسي بويىنشا 0,5 گرادۋسقا كوتەرىلگەن، ال ورتاشا ءبىر جىلدا شىعارىلاتىن كومىرقىشقىل گازىنىڭ كولەمى 62 پايىزعا وسكەن.

ءدال وسى ۋاقىت ارالىعىندا تۇشى سۋ جەتىسپەۋشىلىگى كۇشەيدى، ورمان- توعايلار تەرريتورياسى قىسقاردى جانە مۇحيتتاردا « ءولى ايماقتار» (ولاردا وتتەك از بولادى) اۋماعى كەڭەيدى.

سونىمەن قاتار ماماندار حلورفتوركومىرقىشقىلدارىنان بىرتىندەپ باس تارتۋدىڭ جاعىمدى اسەرى بايقالعانىن ايتتى. مۇنىڭ ارقاسىندا ستراتوسفەرادا وزون تەسىگى كىشىرەيگەن.

«سوڭعى شيرەك عاسىردا جەر شارى تۇرعىندارىنىڭ سانى ەكى ميلليارد ادامعا ءوستى، ال وزگە سۇتقورەكتىلەر جانە باۋىرىمەن جورعالاۋشىلار، قوسمەكەندىلەر مەن بالىقتاردىڭ پوپۋلياتسياسى 30 پايىزعا ازايدى» دەيدى عالىمدار.

ولار ادامنىڭ ەكوجۇيەگە زيانىن ازايتۋعا مۇمكىندىك بەرەتىن 15 قادامدى ۇسىنىپ وتىر. ونىڭ ىشىندە قورىقتار اشۋ، تاماق قالدىقتارىن ازايتۋ جانە جاسىل تەحنولوگيالار ەنگىزۋ سياقتى شارالار بار.

ادامزاتقا ءبىرىنشى ەسكەرتۋ 1992 -جىلى شىعىپ، وعان 1,7 مىڭ عالىم قويعان بولاتىن. ول كەزدە دە ادام ارەكەتىنەن پلانەتا بيوسفەراسىنىڭ ءبۇلىنۋى باستى قاتەر رەتىندە اتالعان بولاتىن. عالىمدار شيرەك عاسىر ىشىندە احۋال قيىنداي تۇسكەنىن ايتادى.