بالاسىنىڭ باۋىرىن اۋىستىرۋ ءۇشىن دونور بولۋدى سۇراعان اناعا قازاقستاندىقتار حابارلاسىپ جاتىر
اقتوبە. قازاقپارات - اقتوبەدە 7-ايلىق ەرسۇلتان رۋسلاننىڭ اناسى شىنار قوشتانبەكوۆا بالاسىنىڭ باۋىرى اۋىراتىنىن، دونور ىزدەيتىنىن ايتىپ، كومەك سۇرادى. بۇل حاباردى ەستىگەن قازاقستاندىقتار جاس اناعا حابارلاسىپ جاتىر، دەپ حابارلايدى قازاقپارات ءتىلشىسى.
ەرسۇلتان رۋسلان قازىر اقتوبە وبلىستىق بالالار اۋرۋحاناسىندا ەم قابىلداپ جاتىر. ول ۇنەمى ەم الۋى ءتيىس. باۋىر سەرروزى دەرتىنە شالدىققان بالانىڭ ۇنەمى دەنە قىزۋى كوتەرىلەدى، ءىشى اۋىرادى. بۇعان دەيىن حابارلاعانىمىزداي، ءسابيدىڭ اناسى شىنار قوشتانبەكوۆا بالاسىنا دونور بولىپ، باۋىرىنىڭ ءبىر بولىگىن بەرەتىن ادامدى ىزدەيتىنىن مالىمدەدى. سەبەبى، كىشكەنتاي ەرسۇلتانعا اناسى مەن اكەسىنىڭ باۋىرى سايكەس كەلمەي شىقتى. ءارى قان توبى І توپ، تەرىس رەزۋس بولۋى ءتيىس. بۇل وتە سيرەك كەزدەسەدى.
«قازاقستاندىقتار جان- جاقتان حابارلاسىپ، ءوز كومەگىن ۇسىنىپ جاتىر. ءبىراق بالامنىڭ قان توبى سيرەك كەزدەسەدى. جىگىتتەر دە حابارلاستى. ولارعا الدىمەن قان توبىن انىقتاۋدى سۇرايمىز، رەزۋس- فاكتورى وتە ماڭىزدى. ۇلكەن ءۇمىت كۇتەمىز. حابارلاسىپ، ءبىزدىڭ جاعدايىمىزدى سۇرايتىندار وتە كوپ»، - دەدى شىنار قوشتانبەكوۆا.
ايتا كەتەيىك، كىشكەنتاي ەرسۇلتان رۋسلان رەسپۋبليكالىق رەەسترگە تىركەلگەن. ەگەر دونور تابىلسا، وتا جاسالادى.
اۆتور: التىناي ساعىندىقوۆا
