جاڭالىق وقيسىز با؟
استانا. قازاقپارات - كۇندەگىسىن كۇندە تاڭەرتەڭگىلىك ۋاقىتىن 15-20 مينۋت جاڭالىق وقۋعا ارنايتىن ادامدار بار. بۇل، ءبىر جاعىنان، دۇرىس شىعار. ءبىراق پىشاقتىڭ ەكى ءجۇزى بولاتىنى ءتارىزدى، كەز كەلگەن نارسەنىڭ جاقسى- جامان جاعى بولادى.
بىردە حالىققا قانداي تاقىرىپ قىزىقتى، قانداي ماقالا كوبىرەك وقىلادى دەگەن ويمەن رەيتينگتىك سايتقا كىرگەن ەدىك. بارلىعىنان كوپ كورىلىم جيناعان - جۇلدىزدارعا قاتىستى جاڭالىقتار. بۇل بىزگە نە ءۇشىن كەرەك؟ وسەكتەن قۇر قالام دەمەسەڭىز، ءبىلۋدىڭ پايداسى جوق. جاڭالىقتى وقىعانمەن، راس- وتىرگىنە كوز جەتپەيدى. قازىر كوپ جۋرناليست وقىرمان الدىنداعى زور جاۋاپكەرشىلىكتى سەزىنبەي، جىلدامدىققا عانا دەن قويادى. سوندىقتان قولدا بار اقپاراتتى دۇرىس- بۇرىسىن تەكسەرمەستەن جاريالايتىن كەزدەر بولادى. ەگەر وقيعاعا تىكەلەي قاتىستى ادامنان سۇقبات الىنعان بولسا دا، ول تەك شىندىقتى ايتقانىنا ەشكىم كۋالىك ەتپەيدى. اق- قاراسى انىق بولماعان سوڭ، جاعدايعا پىكىر ايتۋعا اسىقپاڭىز. ءوز بولجامىڭىزدى ايتقاندا، ەستىگەن جان ونى باسقاعا ايتادى. «قوسىپ ايتپاسا، نەسىن ايتاتىن» وتىرىك- وسەك وسىلاي تۋادى.
جاعىمسىز اقپارات بولسا، سۋرەتتەرىن، بەينەجازباسىن كورىپ، بوسقا جۇرەك اۋىرادى. ەسكەرۋسىز قالدىرۋعا بولمايتىنداي اقپارات بولسا، ەلدىڭ ءبارىنىڭ اۋزىندا جۇرەدى. سولاي- اق حاباردار بولاسىز. ادامداردىڭ سوزىنە كۇمان كەلتىرگەن كەزدە عانا ارنايى ىزدەپ، ءدال سول جاڭالىقتى وقۋعا بولادى. جادىڭىزدى پايداسىز اقپاراتپەن تولتىرماڭىز. جاڭالىق تۇگىلى، كوشەدە ىلىنگەن جارنامالاردى وقىعاننىڭ وزىندە، ميىمىز اقپاراتپەن تولا بەرەدى. قاجەتسىز مالىمەتپەن تولعان ميعا كەزەگى كەلگەندە كەرەكتى ماعلۇمات قونبايدى. سودان كەيىن ەستە ساقتاۋ قابىلەتىڭىز ناشارلاسا، وزىڭىزدەن وزگە كىمگە وكپەلەرسىز؟ قازىر گازەتتەن جاڭالىق وقيتىن جان نەكەن- ساياق ەكەنى ايان. ال ينتەرنەتكە كىرىپ اقپارات الساڭىز، بىرىنەن ءبىرى قىزىقتى بوپ كورىنەتىن جاڭالىقتاردان باس الا المايسىز. ءبىر سىلتەمە ارقىلى ەكىنشىسىنە ءوتىپ، ۋاقىتىڭىز قالاي ءوتىپ كەتكەنىن اڭعارماي قالاسىز. بوسقا وتكەن سول ۋاقىت ورنىنا، ءتىل ۇيرەنۋ، كىتاپ وقۋ سىندى پايدالى ىسپەن اينالىسساڭىز، ءوز باعاڭىزدى ارتتىراسىز.
وتە قىزىققۇمار (ليۋبوپىتنىي) ادام بولساڭىز، سايتتارعا كىرىپ، تاقىرىپتارىن ءبىر وقىپ شىقساڭىز بولادى. كوبىنەسە جاڭالىق سايتتارى ماتىندەگى بار اقپاراتتى ايقايلاتىپ تاقىرىپقا جازىپ قويادى. سوڭعى جاڭالىقتارمەن تانىسۋ ءۇشىن، وزىڭىزگە باقىلاۋ قويىڭىز. بەس مينۋت ىشىندە بارلىق تاقىرىپتى وقىپ ۇلگەرىڭىز دە، دەرەۋ جەلىدەن شىعىڭىز. ءسىز ءۇشىن جاڭالىق وقۋ وتە ماڭىزدى بولسا، ءوزىڭىز قىزىعاتىن سالانى انىقتاپ الىڭىز دا، كەزدەيسوق جازبالارعا باس بۇرمايمىن دەپ وزىڭىزگە ۋادە بەرىڭىز. مىسالى ساياسي جاڭالىقتار، الەمدىك اقپاراتتار، سوڭعى شىققان تەحنيكالىق قۇرالدار تۋرالى اقپاراتتاردى عانا وقىڭىز. ول ءۇشىن سالالىق سايتتارعا عانا كىرىڭىز. نە وقىساڭىز دا، بۇل ماعان نە پايدا بەرەدى دەگەن وي كوكەيىڭىزدە تۇرسىن.
Massaget.kz
