تامارا اسار: قازاقتىڭ ۇلتتىق كيىمىن ديماش ارقىلى الەمگە تانىتۋ كەرەك

مادەني شاراعا جينالعان وتاندىق ەسترادا جۇلدىزدارى ۇلتتىق كيىم مەن اشەكەيلەردىڭ انشىلەر ءۇشىن ماڭىزىنا توقتالىپ، قازاقتىڭ ءداستۇرلى كيىمىن ناسيحاتتاۋ جولدارىن ايتتى، دەپ حابارلايدى Sputnik.

ەسترادا جۇلدىزى جەڭىس ىسقاقوۆانىڭ ايتۋىنشا، قازاقتىڭ ۇلتتىق كيىمى مەن اشەكەيلەرىن ءانشى، سانگەرلەر ارقىلى ناسيحاتتاپ، وسكەلەڭ ۇرپاققا جەتكىزۋىمىز كەرەك.

«ءبىز ونەر ادامى رەتىندە ساحنا ارقىلى ءداستۇرلى كيىمدەرىمىزدى، ويۋ- ورنەكتەرىمىزدى ناسيحاتتاۋىمىز كەرەك. قازىر قاراپ وتىرساڭىز، الەمدىك موداداعى Versace, Gucci, Chanel برەندتەرىن وزدەرىنىڭ ەرەكشە ورنەگى، ەلەمەنتتەرى ارقىلى ءبارى تانيدى، بىلەدى. ءبىز دە قازاقتىڭ ورنەكتەرىن قازاق موداسى دەپ كورسەتۋىمىز كەرەك. ونەر ادامدارى بۇل ءۇشىن نە ىستەي الادى؟ بۇكىل حالىق، بولاشاق ۇرپاق، جاستار ءبىزدىڭ ساحناداعى كيىمدەرىمىزگە قاراپ ەلىكتەۋى مۇمكىن. سوندىقتان كويلەكتەردى تازا قازاقشا قىلىپ ەمەس، زاماناۋي، ادەمى ەتىپ، ويۋ- ورنەكتى، ۇلتتىق فراگمەنتتەرمەن ارلەپ، تىگۋ قاجەت. كەزىندە وسىدان 25-27  جىل بۇرىن قازاقستاندا «سىمبات» دەگەن ءبىر- اق ءسان ءۇيى بولاتىن. سول «سىمباتقا» مەن ەڭ العاش مودا كورسەتىپ شىققان ەدىم. سول كەزدەن باستاپ، مەن قانداي كيىم تىككىزسەم دە، ۇلتتىق ەلەمەنتتەردى، ۇلتتىق ناقىشتى قوسامىن. سوندىقتان ءبىز انشىلەر ارقىلى، ءسان الەمىندەگى ديزاينەرلەر ارقىلى مۇنى بولاشاق ۇرپاققا جەتكىزۋىمىز كەرەك. قازاقتىڭ ءداستۇرلى كيىمى مەن ويۋ- ورنەكتەرىن زاماناۋي قىلىپ تىكسە، الەمدىك برەندتەر جولدا قالادى»، - دەيدى ءانشى.

ىسقاقوۆا قازاقتىڭ ديزاينەرلەرىنە ناسيحات جەتپەي جۇرگەنىن ايتتى.

«ەگەر ءبىزدىڭ ديزاينەرلەردى جاقسىلاپ ناسيحاتتاسا، «ايعايلاپ تۇرعان» الەمدىك برەندتەر ويناماي قالادى. مەن ءوزىم شەتەلگە گاسترولدەرگە شىققاندا، شەتەلدىكتەر قازاقى ستيلدە تىگىلگەن كويلەگىمە قاراپ ەستەرىنەن تانىپ، تامسانىپ جاتادى. ءبىر جانىم اشيتىنى - ءبىزدىڭ ويۋلاردى باتىستىڭ ديزاينەرلەرى وزدەرىنە يەمدەنىپ العان»، - دەپ قىنجىلدى ەسترادا جۇلدىزى.

ال ءانشى تامارا اساردىڭ ايتۋىنشا، قازاقتىڭ ۇلتتىق كيىمىن ديماش قۇدايبەرگەن ارقىلى دا ناسيحاتتاپ، الەمگە تانىتۋعا بولادى.

«مەن ۇنەمى ساحنادا قازاقتىڭ ءداستۇرلى كيىمىن كيىپ جۇرەمىن. مەنىڭ ءاربىر كوستيۋمىم قازاق حالقىنىڭ تاريحىنان سىر شەرتەدى. مەن ءوزىم دە كيىم تىگەمىن، سوندىقتان قازاق حالقىنىڭ ەتنوتاريحىن، ءار ويۋ- ورنەكتىڭ تاريحىن جاقسى بىلەمىن. ءبىر كوڭىلىم تولمايتىنى، قازىر اياق استىندا جاتاتىن كيىز بەن سىرماقتىڭ ويۋ- ورنەكتەرى كيىم- كەشەكتەردە ورنەكتەلىپ ءجۇر. ديزاينەرلەر سونى ەسكەرسە ەكەن دەيمىن. ال الەمدىك نارىققا شىعاتىن ديزاينەرگە مەملەكەت تە قولداۋ كورسەتكەنى دۇرىس. نەمەسە ۇلتتىق برەندتى ناسيحاتتاۋ ءۇشىن ءبىر كونتسەپتسيا ازىرلەۋ قاجەت. ديماش قۇدايبەرگەن ارقىلى دا قازاقتىڭ ويۋ- ورنەگىن، ۇلتتىق كيىمىن الەمگە تانىتىپ، ۇلتتىق برەندتى ىلگەرىلەتۋگە بولادى»، - دەپ تۇيىندەدى ءانشى.

حانۋم ايداش ءوز كىتابىندا العاش رەت قازاقستاننىڭ ەڭ ۇزدىك ءسان ۇيلەرىنە، اتاپ ايتساق، «Aida KaumeNOVA»، «Bibisara»، «ورنەك»، «تاربيا»، «JADO»، ۇلتتىق مادەنيەتتى قولدايتىن «ناز» مەملەكەتتىك ءبي انسامبلدەرىنە، ەڭبەك سىڭىرگەن قايراتكەرلەرگە توقتالدى.