مەيرامبەك بەسپايەۆ حاتقا انمەن جاۋاپ بەردى

بۇل تۋرالى ماسساگەت ءتىلشىسى ءوز ويىن ءبىلدىردى. «قازاقتىڭ مەيرامبەگى» اتانىپ كەتكەن مەيرامبەك بەسپايەۆ كەشە وتكەن تۋعان كۇنىندە الماتى جۇرتىنا ارناپ شىعارماشىلىق كونسەرت بەردى. ءوزىنىڭ تۋعان كۇنى 7 - قاراشا بولسا دا، قۇجات جۇزىندە سەگىزى دەپ جازىلىپ كەتكەندىگىن سوزگە تيەك ەتىپ، ءوزىنىڭ 41 جاسىن حالىقپەن بىرگە تويلاۋدى ءجون كورىپتى. 30  جىل ساحنا تورىندە جۇرگەن ءانشىنىڭ 15  جىلى ۇستازى التىنبەك قورازبايەۆپەن بولسا، 15  جىلى «مۋزارت» توبىمەن بىرگە وتكەن. مەيرامبەك بەسپايەۆتىڭ قازاق ەستراداسى ءۇشىن برەند بولىپ قالىپتاسىپ كەتكەنىن كەشە تاعى اڭعاردىق. سەبەبى رەسپۋبليكا سارايىنىڭ ىشىندە بوس ورىن بولعان جوق.

حالىق تۇرىپ شاپالاق ۇرىپ، ءانشىنىڭ انىنە ءسۇيسىنىپ وتىردى. انشىمەن بىرگە قازاقتىڭ ءبىرتۋار ازاماتتارى مەن انشىلەرى بىرگە قوسىلىپ دۋەت ورىندادى. اتاپ ايتقاندا، سايات مەدەۋوۆ، مەدەۋ ارىنبايەۆ، مادينا سادۋاقاسوۆا، ءمولدىر اۋەلبەكوۆا، ۇشقىن جامال، توقتار سەرىكوۆ جانە شاكىرتى رايىم ۋايىس تا ونەر كورسەتتى. ءسوز اراسىندا «مەيرامبەك حاتقا قالاي جاۋاپ بەرەر ەكەن» دەگەن پىكىرلەر ءجۇردى. اركىم سالاسىنا قاراي كوسىلۋدى ءجون كورسە كەرەك، ەل الدىنا شىعىپ، ءوزىنىڭ بار ەكەنىن، ۇلتىمەن بىرگە ەكەنىن كورسەتۋگە تىرىسقان مەيرامبەك مەدەۋ ارىنبايەۆپەن بىرگە جاڭا ءبىر ءان ورىندادى. ءاننىڭ سوزىندە قازاقتىڭ ءداستۇرى، سالتى مەن قازىرگى بولىپ جاتقان قوعامدىق ماسەلەلەرگە كەلەتىن ماتىندەر بار سوزدەر ايتىلدى. ول عانا ەمەس، ۇشقىن جامالمەن بىرگە ورىنداعان ءانى دە قازاقتىڭ بىرلىگى مەن تاتۋلىعى جونىندە بولدى.

وسى ۋاقىتقا دەيىن ليريكالىق باعىتتا ءان سالىپ كەلگەن ءانشىنىڭ بۇل اندەردى ورىنداۋى حالىقتىڭ كوڭىلىنەن شىقتى. كونسەرتىنىڭ اتاۋىن دا «ەلگە سالەم» دەپ السا بەكەر ەمەستىگى بولار. ءبىر سوزبەن ايتقان كەزدە مەيرامبەك بەسپايەۆتىڭ قوڭىر اۋەنىمەن تەربەلگەن اندەر قازاقتىڭ جۇرەگىندە شىرقالىپ تۇرارى انىق. ال ازامات رەتىندە حالىق الدىنا شىعىپ، ءتىرى داۋىستا، ءتىرى مۋزىكانى ويناتىپ، شىنايى باعدارلاما ارقىلى كونسەرت بەرۋى ۇلكەن جاۋاپكەرشىلىكتى كورسەتەدى. ءانشىنىڭ ماسساگەت پورتالىنا بەرگەن سۇقباتى كەزىندە دە ازاماتتىق پوزيتسياسى بار ءانشى ەكەنىن اڭعارعان بولاتىنبىز. بوزتورعايداي شىرىلداعان ءانشىنىڭ قازاق ەستراداسىنداعى ورنى ەرەكشە ەكەنىن جانىنا ەرىپ كەلگەن قوناقتار مەن انشىلەر دە اتاپ ءوتتى.

Massaget.kz