بالعىنبەك يماشەۆ: كوپتەگەن جاستاردىڭ اجىراسىپ كەتۋىنە اتا-انالارى كىنالى

بۇل رەتتە اتا-انانىڭ ايىبى جاستاردى ماتەريالدىق جانە رۋحاني تۇرعىدان «تويدىرماعانى» سەبەپ دەيدى اقىن.

«جاستار اجىراستى دەپ سوگىپ جاتامىز. قازاق مۇنداي ماسەلەنىڭ الدىن الۋدىڭ جولىن ەجەلدەن بىلگەن. ۇلى ءوسىپ قالعانشا ەنشىسىن بەرۋگە ازىرلەنگەن، قىزى بوي جەتكەن شاقتا جاساۋى دايىن تۇرعان. ەكى جاق قولداۋ كورسەتىپ، جاستاردىڭ اياققا تۇرۋىنا بارىنشا كومەكتەسكەن. قازىر نە؟ ءۇي جوق باسقا جوق نەسيەگە ۇيلەنتىرەدى.

سودان كەيىن اناۋ جوق، مىناۋ جوق جاستار ۇرىسادى، سىيلاستىق پەن ماحاببات جولدا قالادى. وسىدان كەيىن اتا-انا سەبەپشى بولماي كىم سەبەپشى؟ نەگە اجىراستى دەپ تەك جاستاردى كىنالايمىز؟ سوندىقتان ادامنىڭ وزگە جاراتىلىس يەسىنەن ايىرماشىلىعى ول ءومىرىن بولجاپ، قۇدايدان سۇراي وتىرىپ ۇرپاعىنا ءماندى دە ماعىنالى ءومىر سىيلاۋعا تىرىسۋى كەرەك»، - دەيدى اقىن.

اقىننىڭ ايتۋىنشا اجىراسۋ ماسەلەسىندە جاستاردىڭ دا كىناسى بار، ءبىراق اتا-انانىڭ دەمەۋى بولعان جەردە ءسۇيىپ قوسىلعان جاستاردىڭ اجىراسۋ ماسەلەسى ازايۋى ابدەن مۇمكىن دەگەن سەنىمدە. اقىن ماقتانارلىقتاي بالا ءوسىرۋدىڭ نەگىزگى قاعيدالارىن دا اتاپ ءوتتى.

«بىرىنشىدەن اتا-انا قۇدايدان بالاسىنا ءماندى دە ءساندى، ادال ءومىر سۇراۋى كەرەك. اتا-انانىڭ بالاسىنا سۇراعىن تىلەگى، بالاسىنىڭ اتا-اناسىنا جاراتۋشىدان سۇراعانى مىندەتتى تۇردە ورىندالادى. ادال تاپقان دۇنيەمەن وسىرگەن بالانىڭ بويىندا جامان قاسيەتتەر بولمايدى. اتا-انا ادال نان جەگىزۋى كەرەك پەرزەنتىنە.

ەكىنشىدەن اكەسى مەن اناسىنىڭ ءوزىن ۇستاۋى، ءسوزى، اعايىندارىمەن قارىم-قاتىناسى، كەز-كەلگەن ماسەلەنى شەشۋ ءادىسى، سويلەۋىنىڭ ءوزى، ءومىر ءسۇرۋ سالتى، دوستارىمەن ءتىپتى كورشىسىمەن، بالاسىمەن ارالاسۋى ۇلگى بولارلىقتاي بولۋى ءتيىس.

ۇشىنشىدەن مەيىرىمدىلىك. وتباسىنداعى ءبىرىن-ءبىرى قولپاشتاپ، دەمەپ، قولدان كەلسە ءوز ارا جاقسى سوزدەر ايتىپ، تىلەكشى ەكەندەرىن كورسەتە وتىرىپ تاربيەلەۋ. مىنە وسىنداي وتباسىندا وسكەن بالانىڭ جامان ادام بولۋى مۇمكىن ەمەس دەپ ويلايمىن»، - دەيدى «انا مەن بالا» باعدارلاماسىندا قوناقتا بولعان بالعىنبەك يماشەۆ.