كورەيانىڭ ۇلتتىق حورى اباي ءانىن شىرقادى

 استانا. قازاقپارات - كورەيا رەسپۋبليكاسىنىڭ ۇلتتىق حورى قازاقتىڭ ۇلى اقىنى اباي قۇنانباي ۇلىنىڭ «ايتتىم سالەم قالامقاس» ءانىن قازاق تىلىندە ورىنداپ، ەلوردالىق كورەرمەندەردى ءتانتى ەتتى، دەپ حابارلايدى قازاقپارات.

ديريجەر كۋ چوننىڭ جەتەكشىلىگىمەن ارتىستەر مۇنان بولەك قازاقتىڭ حالىق اندەرى « ءبىر بالا» مەن «ناز قوڭىردى» ناقىشىنا كەلتىرە ورىندادى. ولار بۇل ونەرلەرىن وڭتۇستىك كورەيا مەن قازاقستاننىڭ اراسىنداعى ديپلوماتيالىق قارىم- قاتىناستىڭ 25  جىلدىعىنا ارنالعان ارنايى كونسەرتتە كورسەتتى. كورەيا رەسپۋبليكاسىنىڭ ۇلتتىق حورى كونەرت بارىسىندا كارىستەردىڭ ۇلتتىق اندەرىمەن قاتار «ترۋبادور» مەن «تراۆياتا» وپەرالارىنان كلايسسيكالىق كومپوزيتسيالاردى دا ورىنداپ، ەلوردالىق كورەرمەندەردىڭ ىستىق ىقىلاسىنا بولەندى.

 «مەن ءۇشىن حور - بۇل قىستى كۇنگى جاپالاقتاپ جاۋعان قار سياقتى. كوزىڭدى جۇمىپ، حورمەن ايتىلعان اۋەزدى ءاندى تىڭداعان كەزدە تىلسىم اۋەننىڭ كوكتەن تومەن ءتۇسىپ كەلە جاتقانىن سەزىنەسىڭ. ادامزاتتى ءلاززاتقا بولەيتىن، وسىناۋ قيىن ومىرلىك جولدا شابىتتاندىراتىن حورمەن ءان ورىنداۋ جاراتقاننىڭ بەرگەن سىيى سياقتى» ، - دەدى كورەيانىڭ قازاقستانداعى ەلشىسى كيم دە سيك.

 1973 -جىلى قۇرىلعان كورەيا رەسپۋبليكاسىنىڭ ۇلتتىق حورى بۇل ەلدەگى ەڭ ءبىرىنشى كاسىبي حور سانالادى. ول جىلىنا شامامەن 60 قا جۋىق رەت ونەر كورسەتەدى. بۇعان دەيىن حور ۇجىمى ەۋروپانىڭ كوپتەگەن ەلدەرىنىڭ، ا ق ش، رەسەي، قىتاي، جاپونيانىڭ تۇرعىندارىن ونەرلەرىمەن ءتانتى ەتكەن. ايتا كەتەرلىگى، كورەيالىق ونەر ۇجىمى الداعى ۋاقىتتا پاۆلودارداعا كونسەرتتىك باعدارلامامەن بارماق.

 

اۆتور: مارلان جيەمباي