ۇلتتىق بانك ءتوراعاسى: زەينەتاقى جيناعى ءتيىمسىز پايدالانىلۋدا دەپ الاڭداۋعا ەش نەگىز جوق

استانا. قازاقپارات - قر ۇلتتىق بانكى ءتوراعاسى دانيار اقىشيەۆ ءماجىلىس دەپۋتاتى ايقىن قوڭىروۆتىڭ زەينەتاقى جيناعىنا قاتىستى مالىمدەمەسە وراي جاۋاپ بەردى، دەپ حابارلايدى قازاقپارات.

  ەستەرىڭىزگە سالا كەتسەك، 2 - قاراشا كۇنى وتكەن ءماجىلىستىڭ جالپى وتىرىسىندا دەپۋتات اعىمداعى جىلدىڭ 3 - توقسانىنداعى ءبىرىڭعاي جيناقتاۋشى زەينەتاقى قورىنىڭ زەينەتاقى جيناقتارىنىڭ جالپى سوماسى 7 تريلليون 539 ميلليارد تەڭگەگە جەتىپ، ينۆەستيتسيالىق تازا تابىسى 462 ميلليارد بولعانىن ايتقان ەدى. وسىلايشا، كىرىستىلىك دەڭگەيى 6,1 پايىزدى قۇرايدى. ال ءدال وسى كەزەڭدەگى ينفلياتسيا 7,1 پايىز بولدى. دەمەك، زەينەتاقى جيناعىنا ەشقانداي كىرىس قوسىلماعان دەگەن ءسوز.

 «ءبىزدىڭ كوزقاراسىمىزشا، وكىنىشكە وراي ول جەردە ءتۇرلى كەزەڭدەگى ساندارعا ارقا سۇيەلگەن جانە سول ارقىلى قوعامدى اداستىرىپ وتىر. نەگىزىندە زەينەتاقى اكتيۆتەرىنىڭ 9 ايداعى كىرىستىلىگى كەلتىرىلەدى دە، جىلدىق ينفلياتسيامەن تەڭەستىرىلەدى. بۇل دۇرىس ەمەس. قازىر مەن كەلتىرگەن دەرەكتەر زەيناتاقى اكتيۆتەرىنىڭ شىنايى كىرىستىلىگى ينفلياتسيادان جوعارى ەكەندىگىن كورسەتەدى جانە قانداي دا ءبىر جولدارمەن جەلىنۋدە نەمەسە ءتيىمسىز پايدالانىلۋدا دەپ الاڭداۋعا ەش نەگىز جوق»، - دەدى دانيار اقىشيەۆ ۇكىمەتتىڭ سەلەكتورلىق رەجىمدەگى وتىرىسىنان كەيىنگى بريفينگتە.

 ۇلتتىق بانك ءتوراعاسىنىڭ دەرەگىنشە، 1 - قازانداعى زەينەتاقى اكتيۆتەرىنىڭ كولەمى شامامەن 7,5 تريلليون تەڭگەنى قۇرادى. سالىمشىلاردىڭ ەسەپشوتتارىنا 462 ميلليارد تەڭگە كولەمىندەگى ينۆەستيتسيالىق كىرىس ءبولىندى. بۇل 6,68 پايىزدى قۇرايدى. ال وسى ارالىقتاعى ينفلياتسيا كولەمى - 4,2 پايىز.

 «ياعني، جىل باسىنان بەرى وڭ كىرىس قامتاماسىز ەتىلۋدە»، - دەدى ول.

اۆتور: مارلان جيەمباي