ءتىرى جەتىم وسكەن اقتوبەلىك كەلىنشەك قيىن تاعدىرىن ايتىپ بەردى
سەبەبى، كۇيەۋىنەن ءزابىر كورگەن ايەلدەردىڭ - 2، ءتىپتى 5 بالاسى بار. ەكى جاسىندا اناسى تاستاپ كەتىپ، ىشىمدىككە اۋەس اكەسىمەن قالعان ورىنگۇل ورالوۆا قازاقپارات تىلشىسىنە جەتىم وسكەننىڭ قيىندىعىن ايتىپ بەردى.
اقتوبە وبلىسىنداعى جايساڭ بالالار ءۇيىنىڭ تۇلەگى ورىنگۇل ورالوۆا قازىر ءبىر قىزىن ءوزى باعىپ وتىر. تاعدىرى قيىن جاس انا «ماليكا» داعدارىس ورتالىعىنىڭ قۇرىلتايشىسىن تانيدى، بۇرىن جۇمىس بەرگەن باسشى رەتىندە سىيلايدى. باسىنا ءىس تۇسكەندە قايتا اينالىپ كەلىپ، بۇل جولى قولىنداعى كىشكەنتاي قىزى ءۇشىن كومەك سۇرادى.
«ءبىز اقتوبە وبلىسى، تەمىر اۋدانىنىڭ شۇبارقۇدىق اۋىلىندا تۇرعانبىز. مەن 2 جاستان اسقان كەزدە اكەمىز ءىشىپ، انامىز ۇيدەن كەتىپ قالعان. ءتورت بالا ەدىك. ۇلكەن اعام اجەمنىڭ تاربيەسىندە بولىپ، سودان كەيىنگى ەكى اعام تامدى بالالار ۇيىندە، العا بالالار ۇيىندە ەرجەتتى. مەن بالا بولدىم، ەسىمدى بىلمەدىم. جايساڭ بالالار ۇيىندە بويجەتىپ، وڭ-سولىمدى تانىدىم. 7-سىنىپتا وقىپ جۇرگەن كەزىمدە مەنى اعام ىزدەپ كەلىپ، باۋىرلارىمنىڭ بار ەكەنىن ايتتى. ءبارى دە جەتىم ءوستى، جاعدايلارى ناشار. مەن ولاردان كومەك سۇراي المادىم. اكەم 2007 -جىلى قايتىس بولدى، انام ءبارىمىزدى تاستاپ، باسقا ادامعا تۇرمىسقا شىقتى. تانيمىن، ءبىراق ارالاسپايمىن. بالالارى دا بار ەكەنىن بىلەمىن»، - دەدى اقتوبەلىك كەلىنشەك ورىنگۇل ورالوۆا.
جايساڭ بالالار ءۇيىنىڭ تۇلەكتەرى ءبىر-بىرىنە قامقور بولىپ، ۇنەمى كومەكتەسىپ تۇرادى. الايدا ولاردىڭ ءبارى ومىرگە بەيىمدەلمەگەن.
«جايساڭ بالالار ۇيىندە بىزگە تىگىنشى قوسىمشا ماماندىعى بەرىلدى. ءبىراق ءبىز تىگىن ماشيناسىنا وتىرىپ، ءىس تىگۋدى ۇيرەنە المادىق. سول كۇيى كوللەدجدى ءبىتىرىپ شىقتىق. كامەلەت جاسقا تولعان سوڭ جەتىم وسكەن بالالاردى ەشكىم قارامايدى، شىعارىپ جىبەرەدى. مەن سول ءبىر توپ قىزبەن قالاعا كەلدىم، پاتەر جالدادىم. ءبىز بالالار ۇيىندە جۇرگەندە وبلىس ورتالىعىنا كەلمەيمىز، سوندىقتان قالا ءىشىن بىلمەيمىز. كوشەدە ءجۇرىپ گازەتتەن حابارلاما ىزدەدىك، تەلەديداردىڭ جۇگىرتپە جولىن قالت جىبەرمەدىك. كوللەدجدى 2010 -جىلى ءبىتىردىم، سودان بەرى اقتوبە قالاسىندا ءجۇرمىن. بالا باقتىم، قاريالارعا كۇتىم جاسادىم، ىدىس جۋدىم... وسىلاي جۇرگەندە ءبىر جىگىتپەن تانىستىم، ءۇش جىل كەزدەسىپ، ۇيلەنۋگە شەشىم قابىلداعان ەدىك. اناسى «جەتىم قىز، توي جاساعاندا ونىڭ ارتىنان ەشكىم كەلمەيدى، قۇدا-قۇداعيىمىز بولمايدى» دەپ باس تارتتى. سودان جۇكتى بولىپ، قىزىمدى بوساندىم. قازىر ءۇش جاستا. ءوزىمنىڭ جانىمنان قالدىرمايمىن. «بالالار ءۇيىنىڭ قىزدارى ادام سياقتى ەمەس» دەگەن ءسوزدى ءجيى ەستيمىز»، - دەدى و. ورالوۆا.
ايتا كەتەيىك، اقتوبە قالاسىندا «ماليكا» داعدارىس ورتالىعى جۇمىس ىستەپ تۇر. قازىر مۇندا 18 قىز-كەلىنشەك بالالارىمەن تۇرادى.
ورتالىق ديرەكتورى گۇلبادان داۋىتتىڭ ايتۋىنشا، كۇيەۋىنەن ءزابىر كورگەندەر مەن ءۇيسىز قالعانداردىڭ ءبارى وسى جەردى پانالايدى. ولار 6 اي ورتالىقتا تۇرا الادى. ەگەر كومەككە ءالى دە مۇقتاجبىن دەپ ەسەپتەسە - كەلىسىمشارت ۇزارتىلادى.
«بىزگە اۋدانداردان قىز-كەلىنشەكتەر كوپ كەلەدى. ماسەلەن، تۇرمىسقا شىعىپ، بالالى بولعان جاس كەلىنشەك بار. بالاسى تۋا ءبىتتى سال اۋرۋىنا شالدىققان. ايتۋىنشا، كۇيەۋى مەن قايىن اتاسى «بالاڭ مۇگەدەك» دەپ ۇيدەن قۋىپ شىققان. تاعدىرى قيىن ادامداردىڭ ءبارى ىشكى ىستەر ورگاندارىنان، جۇمىسپەن قامتۋ جانە الەۋمەتتىك باعدارلامالار بولىمدەرىنەن، اكىمدىكتەن ەستىپ كەلەدى. ولارمەن پسيحولوگ سويلەسىپ، بالالارى بالاباقشاعا، مەكتەپكە ورنالاستىرىلادى، وزدەرى جۇمىس ىستەيدى. ءبارى جۇمىسقا ارنالاستى. تاماق تانۋ، تۇرۋ - تەگىن. مەديتسينالىق قىزمەتكەرلەر بار، كۇنى- ءتۇنى كەزەكشىلىك قويىلعان»، - دەدى ديرەكتورى گۇلبادان ءداۋىت.
ورتالىقتىڭ كورسەتكەن پسيحولوگيالىق كومەگىنەن كەيىن كەيبىر جاس وتباسىلار تاتۋلاسىپ جاتقانىن ايتا كەتۋ كەرەك.
