ەكى اياعىنان ايىرىلعان پارافيەۆانىڭ ءىسى: اۆتوبۋس جۇرگىزۋشىسى كىناسىن مويىندامادى

بۇگىن سوتتا ايىپتالۋشى - اۆتوبۋس جۇرگىزۋشىسى داۋرەن جاڭابايەۆ، بىرنەشە كۋاگەر، «الماتى تازالىق» وكىلى جانە ساراپشى تىڭدالدى، دەپ حابارلايدى قازاقپارات ءتىلشىسى.

اۆتوبۋس جۇرگىزۋشىسىنە ق ر ق ك 345-بابىنىڭ 2-بولىگى بويىنشا (ابايسىزدا ادامنىڭ دەنساۋلىعىنا اۋىر زيان كەلتىرۋگە اكەپ سوققان كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى) ايىپ تاعىلدى.

ايىپتالۋشى جاڭابايەۆ ءوز كىناسىن مويىندامادى.

«مەن جاروكوۆ كوشەسىمەن ءال-فارابي كوشەسىنە شىقتىم. كەلە جاتىپ، جولدا سىنىپ تۇرعان ليۋكتى، حوندا كولىگىن، ەكى قىزدى كورگەن سوڭ وڭعا قاراي الىپ، ءۇشىنشى جولاققا شىعا باستادىم. سول كەزدە سول جاقتان كەنەتتەن Camry شىقتى. تەجەگىشتى باسىپ ۇلگەرمەدىم. سوعىلدى. مەن وڭ جاققا شىعىپ ۇلگەردىم، ال Camry ۇلگەرگەن جوق. ارت جاعىنان سوققان كەزدە ماشينا 180 گرادۋسقا اينالىپ كەتتى»، - دەدى ول.

داۋرەن جاڭابايەۆ سول كۇنى مەكتەپ وقۋشىلارىن تاسىمالداعان.

اۆتوبۋس يەسى ابزال تۇرعىمبايدىڭ ايتۋىنشا، ول جاڭابايەۆپەن كەلىسىمشارت جاساسپاعان. جۇرگىزۋشى مەكتەپ ديرەكتورىمەن دە اۆتوبۋس يەسىمەن دە ارنايى كەلىسىمسىز جۇمىس جاساعان.

ال ساراپشى ەرجان وتەشوۆ پارافيەۆانىڭ دوڭگەلەگى سىنعان ليۋكتى باسىپ كەتكەن سوڭ جارىلعانىن جەتكىزدى.

سونىمەن قاتار ساراپتاما قورىتىندىسىنا سايكەس، اۆتوبۋس جىلدامدىعى Camry جىلدامدىعىنان گورى جوعارى بولعاندىعى بەلگىلى بولدى.

«الماتى تازالىق» مەكەمەسىنىڭ وكىلى سىنعان ليۋكتىڭ كەسىرىنەن بولعان اپاتتان سوڭ قىزمەتتىك تەكسەرۋ جۇرگىزىلمەگەنىن ايتتى.

ەسكە سالا كەتەيىك، ە. پارافيەۆا 16 -ماۋسىمدا الماتى قالاسىنداعى ءال-فارابي داڭعىلىندا بولعان جول اپاتىنان جاپا شەككەن بولاتىن. Honda CRV كولىگىن تىزگىندەگەن قىزدار اشىق ليۋككە كىرىپ كەتىپ، كولىك دوڭگەلەگىن جارىپ العان. سودان جول شەتىنە توقتاپ، سىرتقا شىعىپ، كولىكتەرىن قاراپ جاتقان كەزدە ورتاڭعى جولاقتا كەلە جاتقان Toyota Camry ماشيناسىن اۆتوبۋس سوققان. قاتتى سوققىدان Toyota Camry اينالىپ، ارتقى جاعىمەن Honda CRV كولىگىن ۇرعان. سالدارىنان قىزدار ورتادا قىسىلىپ قالىپ، بىرەۋى ەكى اياعىنان ايىرىلدى.

قازىر كاتيا بەلگىلى ەرىكتى، جاتتىقتىرۋشى كيرا ۋدارسەۆانىڭ كومەگىمەن وڭالتۋ شارالارىنان ءوتىپ جاتىر. ەندى ول ارنايى جاتتىعۋلاردىڭ ارقاسىندا پروتەز كيۋگە دايىندالماق.

كەلىنشەك قايىرىمدىلىق شارالارىنا، قوعامدىق جۇمىستارعا بەلسەندى ارالاسۋدى باستادى. ول مۇمكىندىگى شەكتەۋلى جاندارعا بارىنشا ءۇمىت سىيلاپ، كۇرەسۋگە كەڭەس بەرىپ كەلەدى. ەكاتەرينا قازىر جاتتىعۋ زالىنا بارىپ ءجۇر.