جاڭا ءالىپبي بويىنشا ۇلتتىق كوميسسيانىڭ قۇرامى قاشان بەكىتىلەتىنى بەلگىلى بولدى
«ەندىگى كەزەكتە بۇل باعىتتا ۇكىمەت تاراپىنان قانداي جۇمىستار جۇزەگە اسىرىلادى؟ سوعان قىسقاشا توقتالايىن. قازىرگى تاڭدا مەملەكەتتىك ءتىلدى لاتىن گرافيكاسىنداعى الىپبيگە كوشىرۋ جونىندەگى جۇمىسشى توبى جۇمىس اتقارىپ جاتىر. ول جۇمىسشى توبىن ەربولات دوسايەۆ باسقارىپ وتىر. بۇعان بەي-جاي قاراپ وتىرعان ەشكىم جوق. بۇكىل مەملەكەتتىك ورگاندار تۇگەل قاتىسۋدا. نەگىزگى ۇيلەستىرۋشى - مادەنيەت جانە سپورت مينيسترلىگى»، - دەيدى عالىمجان مەلدەش.
ونىڭ ايتۋىنشا، جاڭا الىپبيگە كوشۋدىڭ كەزەڭ-كەزەڭ بويىنشا العىشارتتارى جاسالعان. ناقتىراق ايتقاندا، ءۇش كەزەڭ بويىنشا: 2018-2020-جىلدارعا نورماتيۆتىك ۇلتتىق بازانى جەتىلدىرۋ جونىندە ءىس-شارالار، ەكىنشى كەزەڭدەگى 2021-2023-جىلدار ارالىعىندا ينفراقۇرىلىمدى جاساۋ جونىندەگى شارالاردى ىسكە اسىرۋ جانە 2024-2025-جىلدارى ۇيىمداستىرۋشىلىق جۇمىستاردى جۇزەگە اسىرۋ جوسپارلانىپ وتىر.
«بۇلاردى ناقتى قاتىپ قالعان كەزەڭ دەپ ايتۋ ءالى ەرتە. ويتكەنى، 14- قاراشا نەمەسە 16- قاراشا كۇنى تاعى دا جۇمىس توبىنىڭ كەزەكتى وتىرىسى ءوتىپ، ءبىز ۇكىمەت جانىنان لاتىن گرافيكاسىنا كوشۋ جونىندەگى ۇلتتىق كوميسسيانىڭ قۇرامى بەكىتىلەدى. ول كوميسسيادا بۇكىل مەملەكەتتىك ورگانداردىڭ وكىلدەرى، لاۋازىمدى تۇلعالار، حالىقتىڭ ورتاسىنداعى قوعام قايراتكەرلەرى مەن بلوگەرلەر، ەلدىڭ بولاشاعىنا، الىپبيگە جانى اشيتىن ازاماتتار تەگىس جينالادى»، - دەيدى عالىمجان مەلدەش.
