قارۋلى توپ تەلەارناعا شابۋىل جاسادى
پوليتسيانىڭ مالىمەتىنشە، تەلەارنا قىزمەتكەرلەرىنىڭ كوبى عيمارات ىشىندە قالىپ قويعان.
كۋاگەرلەردىڭ ايتۋىنشا، 7 قاراشا كۇنى تاڭەرتەڭ پۋشتۋن تىلىندە حابار تاراتاتىن بەلگىلى تەلەارناعا كەم دەگەندە ءۇش قارۋلى ادام باسىپ كىرگەن. ولار كىرەردىڭ الدىندا جارىلىس بولعان.
تەلەارنا قىزمەتكەرلەرىنىڭ ءبىرى تەلەارنانىڭ بىرنەشە ءجۋرناليسى مەن قىزمەتكەرى عيماراتتان قاشىپ شىققانىن ايتتى.
«كامەرادان ءۇش شابۋىلداۋشىنىڭ تەلەارنا عيماراتىنا كىرگەنىن كوردىم. ولار الدىمەن كۇزەتشىنى اتىپ ءولتىرىپ، سوسىن ىشكە كىردى. بۇدان سوڭ ولار گراناتالار لاقتىرىپ، وق اتا باستادى» دەدى Shamshad TV ءتىلشىسى، عيماراتتىڭ ارتقى ەسىگىنەن سىرتقا قاشىپ شىققان فايسال زالاند France Press اگەنتتىگىنە.
اتى-ءجونىن اتاماعان قاۋىپسىزدىك قىزمەتكەرىنىڭ ايتۋىنشا، شابۋىلداعان ءبىر ادامدى كۇزەتشىلەر اتىپ ولتىرگەن. شابۋىلدان تەلەارنا قىزمەتكەرلەرىنىڭ زارداپ شەككەنى تۋرالى ازىرگە مالىمەت جوق.
شابۋىل كەزىندە تەلەارنا حابارى توقتاپ قالدى.
شابۋىلدى كىم جاساعانى ازىرگە بەلگىسىز. ءبىراق «تاليبان» قوزعالىسى بىردەن شابۋىلعا قاتىسى بارىن جوققا شىعارىپ، مالىمدەمە تاراتتى.
وتكەن جىلى «تاليبان» سودىرى اۋعانستانداعى ەڭ ءىرى جەكەمەنشىك Tolo تەلەارناسىنا شابۋىل جاساپ، جەتى قىزمەتكەرىن ولتىرگەن.
