13:41, 07 - قاراشا 2017 | GMT +6
استانادا ايالداماعا قازاقتارعا قاتىستى بالاعات ءسوز جازىپ كەتكەن ەر ادام سوتتالدى
استانا. قازاقپارات - ايالدامادا باعدار سحەماسى كورسەتىلگەن پلاكاتقا بالاعات ءسوز جازىپ كەتكەن ەر ادامعا ءۇش جارىم جىلعا باس بوستاندىعىنان ايىرۋ جانە ماسكۇنەمدىكتەن ەمدەلۋ ۇكىمى شىعارىلدى.
استانا سوتىنىڭ باسپا ءسوز قىزمەتىنىڭ مالىمەتىنشە، «قازاقتاردى يتشە قىرۋ كەرەك» دەگەن سوزدەردى ەر ادام استاناداعى جەڭىس داڭعىلى بويىنداعى ايالدامادا باعدارلار سحەماسى كورسەتىلگەن باننەرگە جازىپ كەتكەن، دەپ حابارلايدى Sputnik.
ايىپتاۋعا سايكەس، گايسين ق ر ق ك 174-بابى 1-بولىگىندە قاراستىرىلعان ۇلتارالىق الاۋىزدىقتى تۋدىرۋعا باعىتتالعان قاساقانا ارەكەت جاسادى. سوتتالۋشى كىناسىن تولىقتاي مويىنداعان.
سوت گايسيندى ءۇش جارىم جىلعا بوستاندىعىنان ايىرىپ، ماسكۇنەمدىكتەن ەمدەلۋدى تاعايىندادى.
ۇكىم زاڭدى كۇشىنە ءالى ەنگەن جوق.
