وتاندىق ونكولوگتار باس جانە مويىن قاتەرلى ىسىگىنە كۇردەلى وپەراتسيا جاسادى

استانا. قازاقپارات - باس جانە مويىننىڭ قاتەرلى ىسىگىن ەرتە انىقتاعان جاعدايدا ونى ەمدەپ جازۋعا بولادى. قازىر بىرنەشە كەزەڭنەن تۇراتىن ميكروحيرۋرگيالىق وپەراتسيالاردى وتاندىق ونكولوگتاردىڭ وزدەرى جاساي الادى.

وتاندىق ونكولوگتار باس جانە مويىن قاتەرلى ىسىگىنە كۇردەلى وپەراتسيا جاسادى

ال ناۋقاسقا قاجەت قىمبات جابدىقتاردى الۋعا مەملەكەتتەن قوماقتى قاراجات ءبولىنىپ كەلەدى. جىل سايىن قازاقستاندا باس جانە مويىن قاتەرلى ىسىگىنە 2 مىڭنان استام ادام شالدىعادى. ولاردىڭ باسىم بولىگى اۋرۋدىڭ 3-4 ساتىسىندا دارىگەرلەردىڭ كومەگىنە جۇگىنەدى ەكەن. «كەش انىقتالعان دەرتتى ەمدەۋ قيىن»، -  دەيدى دارىگەرلەر.

 ەرتە انىقتالعان جاعدايدا ەمدەلۋشىلەردىڭ 90 پايىزى جازىلىپ كەتەدى.

عالىم ادىلبايەۆ، مەديتسينا عىلىمدارىنىڭ دوكتورى، پروفەسسور:

 -  تىلدەگى ىسىكتى الىپ تاستادىق. جاقتاعى ىسىكتى تازالادىق. بۇل -  ءبىرىنشى كەزەڭ. مويىن بەزدەرىن الىپ تاستاۋ -  ەكىنشى كەزەڭ. ءۇشىنشى كەزەڭدە رەكونسترۋكسيا جۇرەدى. قالىپقا كەلتىرۋ. سونىمەن ءبىزدىڭ وپەراتسيالار ءۇش كەزەڭنەن تۇرادى.

 كومەي، اۋىز قۋىسى، جۇتقىنشاق، مۇرىن قۋىسى، سىلەكەي بەزدەرىنىڭ قاتەرلى ىسىگىنە بىرنەشە كەزەڭنەن تۇراتىن كۇردەلى وپەراتسيا جاسالادى. ءدام سەزۋ، داۋىس شىعارۋ قىزمەتىن قالپىنا كەلتىرۋ ءۇشىن پروتەزدەر سالىنادى. مۇنىڭ بارلىعىنا مەملەكەتتەن قارجى قاراستىرىلعان.

يگور پريما، ەمدەلۋشى:

 -  بارلىق قىزمەتتى اتقارىپ تۇر. ونسىز مەن سويلەي الماس ەدىم. مەن دارىگەرلەرگە اۋرۋدىڭ ەڭ سوڭعى ساتىسىندا كەلدىم. قازىر جاعدايىم جاقسى.

ونكولوگيا جانە راديولوگيا عىلىمي زەرتتەۋ ينستيتۋتى رەسپۋبليكانىڭ 6 قالاسىندا باس جانە مويىن قاتەرلى ىسىگىن ەرتە انىقتاۋعا ارنالعان اپتالىق وتكىزگەن. ناتيجەسىندە 30 ادامدا قاتەرلى ىسىك انىقتالعان. ينستيتۋت ماماندارى اتالعان شارانى ەلىمىزدىڭ باسقا ايماقتارىندا دا وتكىزۋدى جوسپارلاپ وتىر.

www.khabar.kz